महेन्द्रनगर - आइतबारदेखिको झरीका कारण कञ्चनपुर जलमग्न भएको छ। बुधबार साँझसम्म कञ्चनपुरमा ५ सय घर डुवानमा परेका छन्। प्रशासनका अनुसार डेढ सय परिवार बाढीले विस्थापित भइसकेका छन् र यो क्रम जारी छ।

 

कञ्चनपुरको भीमदत्त नगरपालिका क्षेत्र पुरै डुवानमा परेको छ। महेन्द्रनगरदेखि ६ किलोमिटर टाढाको गड्डाचौकी नाकासम्मको बस्ती बढी डुवानमा परेको छ। बाढी घरमा पसेपछि उनीहरु सुरक्षित बासस्थान खोजिरहेका देखिन्थे। केहीले घरका सामग्री र गाईवस्तु सुरक्षित स्थानमा ओसारेका छन्।

बुधबार साँझसम्म महेन्द्रनगर–गड्डाचौकी सड्क खण्ड जलमग्न बनेको छ। पूर्व-पश्चिम राजमार्ग नहरमा परिणत भएपछि उक्त सड्क खण्डमा यातायात अवरुद्ध रह्यो। महाकाली नदीमा अत्यधिक बाढी आएपछि वनबासा र टनकपुर पुलमा आवतजावत निषेध गरिएको छ। महाकालीमा एक लाख ३४ हजार क्युसेक फिट पानी पुगेको कञ्चनपुर प्रहरीले जनाएको छ। गड्डाचौकी र ब्रह्मदेव नाका भएर भारत आवतजावत गर्ने यात्रुलाई मर्का परेको छ। उनीहरु महेन्द्रनगर र गड्डाचौकीमै थन्किएका छन्।

उता भारतबाट आएका नेपालीहरु वनबासा र टनकपुरमै रोकिएका छन्। पुलमा ओहोरदोहोर गर्न नदिएपछि महेन्द्रनगर, ब्रह्मदेव, वनबासा, टनकपुरलगायतका बजारमा व्यापारिक गतिविधि न्युन छ। वर्षाका कारण दैजी गाविसको चम्फापुर क्षेत्रमा गाडिएका विद्युत प्राधिकरणका ३३ वटा खम्बा ढलेका छन्। खम्बा ढलेपछि झलारी र बेलौरी क्षेत्रको विद्युत् सेवा दुई दिनदेखि अवरुद्ध छ।

बाढीले कञ्चनपुरको अधिकांश क्षेत्रको धान वाली डुवानमा परेको छ। भर्खर लगाएको धान वाली कतिपय ठाउँमा बाढीले बगाएको छ। बाढीले पूर्व-पश्चिम राजमार्गबाट ग्रामीण भेग जोड्ने सड्क खण्ड अवरुद्ध भएकाले उद्दार र राहत कार्यमा बाधा पुगेको कञ्चनपुर रेडक्रसले जनाएको छ।

अविरल वर्षासँगै आएको बाढीका कारण कञ्चनपुरका सम्पूर्ण विद्यालय बन्द रहे। विद्यार्थी दिनभर घरमै थन्किए। यस्तै सरकारी कार्यालय खुले पनि कामकाज हुन सकेन। अधिकांश कार्यालयका कर्मचारी बाढीग्रस्त क्षेत्रमा उद्दारका लागि जुटिरहेका देखिन्थे। सर्वसाधारण सेवाका लागि आउन नसकेपछि केही कर्मचारी चाँडै घर फर्केका थिए।