आफ्नै ७ वर्षीय छोरालाई बन्चरो प्रहार गरी हत्या           (२०६७ आषाढ १७, विहीवार)

धनकुटा, अषाढ १६ - धनकुटाको हात्तिखर्क गाविस ७ का पहलमान मगरले मंगलबार राति आफ्नै ७ वर्षीय छोरालाई बन्चरो प्रहार गरी हत्या गरेका छन् ।

मध्य राति भएको घरायसी झगडाको क्रममा मगरले छोरा बिशाललाई बन्चरो प्रहार गरेका थिए । गम्भीर घाइते बालकको उपचारका क्रममा धरानस्थित विपी कोइराला स्वास्थ्य विज्ञान प्रतिष्ठान धरानमा बुधबार बिहान मृत्यु भएको प्रहरीले जनाएको छ ।

बन्चरो प्रहारबाट मगरकी पत्नि रितुमाया र छिमेकी तयबहादुर मगर समेत घाइते भएका छन् ।

रितुमायालाई आक्रमण गर्दा छुट्याउन गएका छिमेकी माथि पनि बन्चरो प्रहार गरिएको स्थानीयबासीले बताए । घाइतेहरुको स्थानीय स्वास्थ्य चौकीमा उपचार भइरहेको छ । हत्यामा संलग्न पहलमानलाई प्रहरीले पक्राउ गरी जिल्ला प्रहरी कार्यालयको हिरासतमा राखेको छ ।