नेपाली युवतीसँग विवाह गरी १० वर्षदेखि नेपालमा रहँदै आएका दुई दक्षिण कोरियालीलाई जासुसको आशंकामा १० दिनभित्र देश छाड्न अध्यागमन विभागको निर्देशन

प्रहरीले हक अपहरणमा नपरी रेस्टुरेन्ट सञ्चालन गर्दा लागेको ७० लाख रुपैयाँ ऋण तिर्न नसकी भागेको खुलेको जनाएको छ। हकलाई भारत हुँदै कोरिया भगाउन सहयोग गरेको पक्राउ परेका दुवैले प्रहरी बयानमा सकारेका थिए।

सार्वजनिक अपराधमा कारबाहीपछि तीन साताअघि दुवै कोरियाली नागरिक धरौटीमा रिहा भएपछि प्रहरीले थप अनुसन्धानका लागि अध्यागमनलाई बुझाएको थियो।

अध्यागमन अधिकारीका अनुसार अनुसन्धानबाट उनीहरूलाई देशनिकाला गर्नुपर्ने गतिविधि नदेखिए पनि शंका लागेकाले स्वदेश फर्काउने निर्णय भएको हो।

अनुसन्धानमा संलग्न प्रहरी अधिकारीका अनुसार पर्यटन भिसामा नेपाल आएका हकले रेस्टुरेन्ट सञ्चालनका क्रममा ऋण तिर्न नसकेर उनी दक्षिण कोरियाली नागरिकको सहयोगमा नेपालबाट भारतको नयाँदिल्ली हुँदै स्वदेश फर्केको खुलेको थियो। प्रहरी बयानमा दुवैले यस्तो तथ्य स्विकारेका थिए।