काठमाडौं – संचारमाध्यमहरुले जनाए अनुसार परराष्ट्र मन्त्रालयले पुष १८ गतेबाट उपत्यकाका तीन जिल्ला काठमाडौं, ललितपुर र भक्तपुरका जिल्ला प्रशासन कार्यालयबाट यन्त्रले पढ्न सक्ने राहदानी (एमआरपी) को लागि आवश्यक निवदेन बुझ्ने र वितरण गर्ने भएको छ। आइतबार बाट एमआरपी वितरण सुरु गरेको परराष्ट्रले राहदानी वितरणलाई सहज बनाउन तत्कालका लागि उपत्यकाका तीन जिल्लाबाट पनि जारी गर्ने निर्णय गरेको हो।
‘पुस १८ गतेबाट काठमाडौं, ललितपुर र भक्तपुरका जिल्ला प्रशासन कार्यलयबाट एमआरपीका लागि आवश्यक फाराम बुझ्ने र जारी गर्ने निर्णय भएको छ,’ परराष्ट्रका सहायक प्रवक्ता हरिस्चन्द्र घिमिरेले भने, ‘जिल्ला प्रशासन कार्यालयबाट निवेदन पुष १८ गतेबाट संकलन गर्न सुरु गरिने भएपनि जारी गर्ने काम भने एक महिना पछि मात्र सुरु हुनेछ।’
परराष्ट्रको यो निर्णयसँगै आइतबारबाट अब काठमाडौं, ललितपुर र भक्तपुरका नागरिकले परराष्ट्रबाट एमआरपी लिन पाउँने छैनन्। घिमिरेका अनुसार तीन जिल्लाका नागरिकले आ-आफ्नै जिल्लाबाट मात्रै एमआरपी लिनु पर्नेछ र अन्य ७२ जिल्लाका नागरिकले परराष्ट्र मन्त्रालयबाट लिन सक्नेछन्। परराष्ट्रका अनुसार तीन जिल्लामा एमआरपी वितरण सफल भएपछि अन्य जिल्लाबाट पनि जारी गरिने छ।
पौष १३ गते, २०६७ मा प्रकाशित
