मजदुर र कारखानाबीच भएको सम्झौता कार्यान्वयन नगरेको भन्दै जनकपुर चुरोट कारखाना ठप्प

समाचार अनुसार फागुन २५ गते भएको समझौताको कार्यान्वयन बारे जानकारी लिन मंगलवार विहान महाप्रन्धक निवास पुगेका मजदुर नेताहरुसंग महतोले दुर्व्यावहार गरे पछि आक्रोशित मजदुरहरु उनको सम्पूर्ण सुविधा काटेका हुन । उनीहरुले महाप्रवन्धक क्वाटरलाई घेराउ गरेका छन् । महाप्रन्धक महतो आफ्ना केही सहयोगीका साथ निवासमा लुकेर बसेका छन् । महाप्रवन्धक निवास अगाडि सुरक्षा व्यवस्था बढाईएको छ ।

मजदुर समन्वय समितीको मंगलवार विहान बसेको आकस्मिक बैठकले महाप्रवन्धक महतोको सम्पूर्ण आर्थिक तथा भौतिक सुविधा बन्द गर्ने निर्णय गरेको छ । समिति सम्वद्ध राष्ट्रिय प्रजातान्त्रिक मजदुर संगठनका तेजनारायण साहले दिएको जानकारी अनुसार- समन्वय समितीको बैठकले महाप्रवन्धकको कुनै पनि लिखित वा मौखिक आदेश नमान्ने,सवारी साधन खोस्ने,आर्थिक तथा भौतिक सुविधा कटौती गर्ने तथा वरीष्ट कर्मचारीको नेतृत्वमा कारखाना संचालन गर्ने निर्णय गरेको छ ।

फागुन २५ गते भएको समझौतामा महाप्रवन्धक महतोले यसअघि लिदै आएको एक प्रतिशत बिक्री प्रवर्द्धन भत्ता नियमानुसार ठिक भए/नभएको ठहर गरी नियम विपरीत भए हाल सम्म खाएको रकम समेत फिर्ता गर्नु पर्ने निर्णय भएको थियो । यसै गरी निजामती कर्मचारी सरहको तलब मिलान,कच्चा पदार्थ तथा स्पेयर पार्टसको नियमित आपूर्ति,पूर्वाग्रही सरुवा,कार्यवाही र अनियमित भर्ना रोक्नु पर्ने लगायतका निर्णय भएको थियो । महाप्रवन्धकको रुपमा दोश्रो पटक असोज ३ गते हाजिर भएका महतोले नियम विपरीत  तरीकाले बिक्री प्रवर्द्धन वापत १ प्रतिशत रकम लिदै आएका हुन । कारखाना सम्बद्ध कामदारहरुले यसको विरोध गर्दै पटक पटक आन्दोलन पनि गरेका छन् । अख्तियारले पनि छानवीन गरी रहेको छ तर उनले अझै पनि बिक्री प्रवर्द्धन वापतको रकम बुझ्दै आएका छन् । 

नेपाल कारखाना श्रमिक संघका अध्यक्ष मदन ठाकुरका अनुसार महाप्रवन्धकले समझौता कार्यान्वय गर्ने तर्फ कुनै प्रयास गरेका छैनन । उनले भने-‘विरामी छु भन्दै कारखाना आउदैनन । कारखानाको गाडीमा धार्मिक कार्यक्रमहरु चहारी रहन्छन् ।’

चरम आर्थिक संकटमा रहेको जचुकालीले गत असोजमा नयाँ वानेश्वरस्थित क्षेत्रीय कार्यालय भवन र जग्गा ७२ करोडमा बिक्री गरेको थियो । सम्बद्ध मजदुर नेताहरुका अनुसार-जग्गा बिक्रीबाट आएको रकम पनि निर्धारित शीर्षकमा खर्च गरिएको छैन । श्रमिक संघका अध्यक्ष ठाकुरले भने-‘उनि-महाप्रवन्धक महतो)आएको आठ महिना भित्र ५१करोड अधिक खर्च भई सकेको छ तर कारखानाको उत्पादन बढेको छैन ।अवकासप्राप्त कर्मचारीहरुको निवृतिभरण,वीमा बुझाउन सकिएको छैन । कच्चा पदार्थको आपूर्ति हुन सकेको छैन ।

सम्बद्ध कर्मचारीहरुका अनुसार-७२करोडको अचल सम्पति बिक्री गरेर पनि जचुकालि झण्डै ५०करोड घाटामा छ ।