एमालेको भागमा बाँकी पाँच मन्त्री र पाँच राज्यमन्त्रीका लागि तीन प्रमुख नेताहरूद्वारा झन्डै दुई दर्जन नाम प्रस्ताव

काठमाडौं –  एमाले स्थायी समितिको आइतबारको बैठकमा प्रधानमन्त्री झलनाथ खनाल, वरिष्ठ नेता माधवकुमार नेपाल र केपी ओलीले छुट्टाछुट्टै व्यक्तिलाई प्रस्ताव गरेपछि मन्त्रीमा कसलाई पठाउने भन्ने अन्तिम टुंगो लाग्न सकेन ।

 

एमालेको भागमा बाँकी पाँच मन्त्री र पाँच राज्यमन्त्रीका लागि तीन प्रमुख नेताले झन्डै दुई दर्जन नाम अघि सारेका छन् ।

 

स्थायी समितिले प्रस्तावित नामहरूमा प्रधानमन्त्रीले आपसी परामर्श गरी टुंगो लगाउने जिम्मेवारी दिएको छ । ‘दुई दर्जनजतिको नाम आएको छ, प्रधानमन्त्रीले आपसी परामर्श गरेर टुंग्याउने निर्णय भएको छ,’ बैठकपछि सचिव शंकर पोखरेलले भने ।

 

प्रधानमन्त्री खनालले मन्त्रीका लागि भानुभक्त जैसी, गोकर्ण बिष्ट, रघुवीर महासेठ, उर्मिला अर्याल र युवराज कार्कीलाई प्रस्ताव गरेका छन् । उनले राज्यमन्त्रीहरूमा दलबहादुर राना, दलबहादुर सुनार, रामजीप्रसाद शर्मा, महमुद आलम र डम्बरसिंह सम्बाहाम्फेको नाम अघि सारेका छन् । प्रधानमन्त्रीले प्रस्ताव गरेकामध्ये जैसी, महासेठ, कार्की, सुनार, शर्मा र सम्बाहाम्फे सभासद हुन् ।

 

स्थायी समिति सदस्य केपी ओलीले खगराज अधिकारी, थममाया थापामगर, नागेन्द्र चौधरी, विजय सुब्बा र धर्मनाथप्रसाद साहको नाम प्रस्ताव गरेका छन् । जगत विश्वकर्माको नाम अघि सारे पनि राज्यमन्त्रीका लागि कसलाई पठाउने भन्नेमा ओलीले खासै जोड नदिएको स्रोतले बतायो । ओलीले प्रस्ताव गरेकामध्ये थापामगर एक जना मात्र सभासद हुन् । 

 

वरिष्ठ नेता माधवकुमार नेपालले महेन्द्र पाण्डे, कृष्णप्रसाद सापकोटा र सरला यादवको नाम प्रस्ताव गरेका थिए । सापकोटा र यादव सभासद हुन् । पार्टीभित्रको आन्तरिक सन्तुलन र भौगोलिक तथा जातीय प्रतिनिधित्व मिलाउनुपर्ने भएकाले मन्त्री छान्न एमालेमा समस्या परेको हो । एमालेको भागमा आठ मन्त्रालय परेकामा स्थायी समिति सदस्य भरतमोहन अधिकारी, सचिव विष्णु पौडेल र गंगालाल तुलाधर यसअघि नै मन्त्री भइसकेका छन् ।

 

अब पाँच मन्त्री र बढीमा पाँच राज्यमन्त्री पार्टीको भागमा छ । मन्त्री छनोट हुन नसक्दा गठन भएको दुई महिना भइसक्दा पनि सरकारले पूर्णता पाएको छैन । यसैबीच स्थायी समिति बैठकले वैशाख १४ गते केन्द्रीय समिति बैठक गर्ने मिति तय गरेको छ ।