चैत्र २६ गते, २०६७ मा प्रकाशित
नयाँदिल्ली – रमेशनाथ पाण्डेले भारतका राष्ट्रिय सुरक्षा सल्लाहकार शिवशंकर मेननसंग शुक्रवार यहाँ भेटेका छन् ।
पूर्व परराष्ट्रमन्त्री पाण्डेका अनुसार, भेटमा मेननले नेपालमा संक्रमणकाल लम्बिदैं गएको तथा राजनीतिक अन्योलता गहिरिदैं गएको भन्दै चिन्ता जाहेर गरेका थिए । आपसरी समझदारी र सामूहिक ज्ञानका साथ नेपाल अघि बढ्नुपर्ने आवश्यकता औल्याउँदै उनले भारत नेपालको इमान्दार मित्र भएको पनि उल्लेख गरे ।
‘नेपालको स्थायित्व र समुन्नतिमा भारतीय रुची मैले पाए । कसैप्रति बायस भएको मैले पाइन,’ भेटपछि पाण्डेले भने । करिब एक घण्टा लामो भेटमा मेननले नेपालको पछिल्लो राजनीतिक अवस्थाबारे पाण्डेको धारणा सुनेका थिए ।
पाण्डेले आपसी विश्वास वृद्धि गर्दै दुई मुलुकबीच नमूना सम्बन्ध बनाउन सकिने मेननलाई बताएका थिए । शुक्रवार बिहान नयाँ दिल्ली आइपुगेका पाण्डे शनिवार बिहान काठमाण्डौं फर्कदैं छन् ।
अन्य समाचारहरु
