आषाढ़ २७ गते, २०६८ मा प्रकाशित
काठमाडौं – पर्यटन तथा नागरिक उड्ड्यनमन्त्री खड्गबहादुर विश्वकर्मा
समक्ष तारा एयरको ट्विनअटर विमान दुर्घटना भएको सम्बन्धमा गठित दुर्घटना जाँच
आयोगले आज आफ्नो प्रतिवेदन बुझाएको छ ।
काठमाडौंको क्षेत्रीय नियन्त्रण कक्षबाट ट्राफिक सूचना विमान चालकलाई गलत उपलब्ध
गराउनु र बिग्रँदो मौसमी अवस्था र उडानमार्गको भौगोलिक अवस्थितिलाई ध्यानमा राखी
विमान तल झार्ने स्वीकृत नदिई विमान दस हजार पाँच सय फिटको उचाइमा लैजान नसक्नु
दुर्घटनाको प्रमुख कारण औंल्याइएको छ ।
विसं. २०६७ मङ्सिर २९ गते लामिडाँडाबाट काठमाडौं फर्कने क्रममा ओखलढुङ्गाको करिब
नौ हजार फिटको मानेडाँडामा ठोक्किएर सो विमान दुर्घटना हुँदा चालकदलका तीनसहित २२
जनाको मृत्यु भएको थियो ।
सो विमानमा नेपाली भएको परिचय दिँदै १८ जना भुटानी र एकजना तिब्बती नागरिक
यात्रुका रुपमा रहेका थिए । काठमाडौँका हवाई ट्राफिक नियन्त्रकले विमानका चालकलाई
रुम्जाटारबाट लुक्ला पुगिसकेको हेलिकप्टरबाट स्थितिलाई काठमाडौँबाट लुक्लाका लागि
उडेको र सो समयमा रामेछापमा पुगेको भनी अनुपयुक्त ट्राफिक सूचक दिएको प्रतिवेदनमा
उल्लेख छ ।
त्यसैगरी, विमानका प्रमुख चालकले विमानको उडान नियन्त्रण आफ्नो जिम्मा लिइरहेका
आफ्ना सहचालकलाई बिग्रँदो मौसमी अवस्था र उडानमार्गको भौगोलिक स्थितिलाई ध्यान
नदिएको साथै दस हजार पाँच सय फिट चढिरहेको विमानको उचाइलाई आठ हजार पाँच सय फिटमा
झार्दा विमानको देब्रे पखेटाले मानेडाँडाको चट्टानमा ठोक्किएको जनाइएको छ ।
प्रतिवेदनमा फेरि पनि यस्ता दुर्घटना हुन नदिन सम्बन्धित निकायलाई विभिन्न
सुरक्षात्मक सुझावहरू दिइएको छ ।
प्रतिवेदन ग्रहण गर्दै मन्त्री विश्वकर्माले नेपालको हवाई यातायातलाई कसरी
सुरक्षित बनाउन सकिन्छ त्यसतर्फ सबैले सचेत भई यस्ता घटना नदोहोरिने वातावरण
सिर्जना गर्न आग्रह गरे । उनले प्रतिवेदनका सुझावलाई गम्भीरताका साथ लिई
कार्यान्वयनमा जोड दिइने उल्लेख गरे ।
मन्त्रालयका सचिव डा गणेशराज जोशीले नागरिक उड्ड्यनका पूर्व मौसमको जानकारी
प्राप्त गर्न उपकरणहरू राखिने बताए ।
आयोगका अध्यक्ष एवम् प्राधिकरणका पूर्वमहानिर्देशक मेदिनीप्रसाद शर्माले
दुर्घटनासँग सम्बन्धित सबैसँग सोधपुछ गरी सत्यतथ्य पत्ता लगाउन प्रयास गरिएको बताए
।
आयोगका सदस्यसचिव एवम् मन्त्रालयका सहसचिव सुरेश आचार्यले विदेशी यात्रु चढेकै
कारण तौल बढेको होइन भन्दै नेपालीको परिचयमा भुटानीलाई किन विमानमा लगियो यसबारेमा
मन्त्रालयले छानबिन गरिरहेको र प्रतिवेदन केही दिनमै आउने बताए ।
– रासस
अन्य समाचारहरु
