श्रावण ३२ गते, २०६८ मा प्रकाशित
जनकपुर – प्राप्त समाचार अनुसार धनुषा र सिरहा जिल्लाको सीमाना जोड्ने कमला नदीमा डुंगा फुट्दा डुंगामा सवार १५ जना यात्रु हराइरहेका छन् ।
उनीहरुको खोजी कार्य भइरहेको जिल्ला प्रहरी कार्यालय सिरहाले जनाएको छ । धनुषाको सिंगियाही मरानको कोयलपुर घाटबाट ३०/३५ जना डुंगामा चढेर सिरहाको निर्दनातर्फ आइरहेको अवस्थामा मंगलवार साँझ नदीको बीचमा नै डुंगा फुट्दा डुंगामा सवार यात्रुहरुलाई नदीले बगाएको थियो ।
डुंगामा सवार यात्रुहरु मध्ये २० जनालाई स्थानीयबासी, सशस्त्र प्रहरीले उद्धार गरेपनि १५ जना अझै हराइरहेको र उनीहरुको खोजी कार्य स्थानीयबासी र प्रहरीले गरिरहेको स्थानीय मुसहरु यादवले बताए ।
डुंगामा सवार रहेको यात्रुहरुको संख्या यकिन नभएकोले कति जना हराइ रहेको अहिले नै भन्न नसकिने उनले बताए । नदीमा मंगलबार अचानक आएको बाढीले डुंगा फुटेको स्थानीयबासीहरुले बताए ।
डुंगामा सवार र हराइरहेकाहरु अधिकांश चिकना गाविसस्थित निर्दनाको नै रहेको स्थानीय राजबिन्द यादवले बताए ।
अन्य समाचारहरु
