भाद्र १६ गते, २०६८ मा प्रकाशित
लडाकूको हतियार राखिएका कन्टेनरको चाबी विशेष समितिलाई बुझाउने पार्टी निर्णयविरुद्ध एकीकृत माओवादी उपाध्यक्ष मोहन बैद्य समूहका कार्यकर्ताले शुक्रबार बिहान एक घण्टा चक्काजाम गरेका छन् ।
बैद्य समूहले बिहान साढे नौ बजेदेखि एक घण्टासम्म राजधानीलगायत मुलुकभर एकैसाथ चक्का जाम गरेका हुन् ।
राजधानीको रत्नपार्क,कलंकी,महाराजगञ्ज, सातदोबाटो,कुपन्डोल,लगायत विभिन्न १२ स्थानमा जम्मा भएर बैद्य पक्षीय कार्यतकर्ताले सवारी आवागमन ठप्प परेका हुन् । सडकमा उत्रने कार्यकर्ताको संख्या भने न्यून थियो । उनीहरुले लडाकूको चावी बुझाउने निर्णयलाई धोका र आत्मसमर्पणको संज्ञा दिँदै तत्काल निर्णय फिर्ता लिन माग गरेका छन् । बैद्य पक्षीय पोलिटव्युरो सदस्य कुलप्रसाद केसीले आफू पक्षीय जनवर्गीय संगठनका कार्यकर्ताको सहभागितामा चाबी बुझाउने संस्थापन पक्षको निर्णय सच्याउन दबाब दिने उद्येस्यले विरोध प्रदर्शन गरिएको अनलाइनखबरलाई जानकारी दिए । निर्णय नसच्चाए थप आन्दोलनका कार्यक्रम सार्वजनिक गर्ने केसीले चेतावनी दिए ।
साँचो हस्तान्तरण प्रकरणले माओवादीमा ठूलै रडाँको मच्चिने देखिएको छ । कलंकीमा चक्काजामको नेतृत्व गरेका बैद्य पक्षीय केन्द्रीय सल्लाहकार सुरेश आलेमगरले चक्काजामपछि आयोजित कोणसभामा बोल्दै निर्णय फिर्ता नलिए सरकारलाई दिएको समर्थनसमेत फिर्ता लिने चेतावनी दिए । बैद्य पक्षले राजधानी बाहिरका चितवन, सिन्धुली, पोखरा, रोल्पा, दाङ, नुवाकोटलगायतका जिल्लामा पनि चक्काजाम आयोजान गरेको छ । नुवाकोटमा करिब १० जना र सिन्धुलीमा एक दर्जनजतिको संख्यामा बैद्य पक्षीय कार्यकर्ता सडकमा देखिएका थिए ।
सो समूहले साँझ साढे ६ बजे राजधानीका मुख्यमुख्य चोकहरुमा मशाल जुलुश प्रदर्शन गर्ने जनाएको छ । माओवादी स्थायी समितिको निर्णयअनुसार विशेष समितिले बुधबार कन्टेनरका चाबी समितिअन्तर्गतको प्राविधिक टोलीका सदस्यलाई बुझाउने निर्णय गरेको थियो । इलामको चुलाचुली, चितवनको शक्तिखोर, नवलपरासीको झ्याल्टुनडाँडा लगायतको शिविरका हतियार राखिएका कन्टेनरको चाबी लडाकू कमाण्डरहरुले बिहीबार समिति अनुगमन टोलीलाई बुझाएको थियो ।
अन्य समाचारहरु
