पौष २ गते, २०६८ मा प्रकाशित
भैरहवा – थाईल्याण्डका पूर्व प्रधानमन्त्री थाक्सिन सिनावात्राले शनिबार बुद्धजन्मस्थल लुम्बिनीमा पुजापाठ गरेका छन् । शुक्रबार साँझ गोप्य रुपमा लुम्बिनी आएका थाक्सिन विहानैदेखि लुम्बिनीस्थित मायादेवी मन्दिर, अशोक स्तम्भ र थाई राजकीय विहारमा पुजापाठ र प्रार्थनामा व्यस्त रहे ।
उनी साथमा, निजी सचिव, नेपालका लागि थाईल्याण्डका राजदुत मारिस साङयिम्पोङस, राजदुतको परिवारसहित अन्य करिव एक दर्जन सहभागी थिए ।
बुद्ध जन्मस्थल लुम्बिनीको भ्रमण र पूजापाठ पश्चात् लुम्बिनी विकास कोषको आगन्तुक पुस्तिकामा आफ्नो उपस्थिती जनाउँदै थाक्सिनले जन्मैदेखि लुम्बिनी आउने धोको पुरा भएकोले निकै गौरवान्वित भएको लेखेका छन् ।
लुम्बिनीको विकासका निम्ति थाईवासीमा ईच्छाशक्ति र श्रोतपनि भएको कुरा उल्लेख गर्नु भएको लुम्बिनी विकास कोषका कर्मचारीले जनाएका छन् ।
लुम्बिनी आउँदा काठमाडौंबाट यति एयरको नियमित उडानबाट गोप्य रुपमा भैरहवा आइपुगेको पूर्व प्रधानमन्त्री थाक्सिन सहितको टोलीले फर्कनका निम्ति भने यति एयरको एउटा विमान चार्टर गरेको थियो ।
तर, विहानैदेखिको बाक्लो हुस्सु र कुहिरोले भैरहवा विमानस्थल खुल्न नसक्नुले दिउसो साढे १२ बजे काठमाडौंबाट उड्नु पर्ने विमान २ बजेसम्म उड्न सकेको थिएन ।
अन्य समाचारहरु
