माघ १ गते, २०६८ मा प्रकाशित
चिनियाँ प्रधानमन्त्री बेनजिया बाओको नेपाल भ्रमण चार घण्टामात्रै हुनुमा सरकारको नलायकीपन झल्किएको आरोप प्रतिपक्षी दलका नेतहरुले लगाएका छन् । राजधानीमा गरिएको कार्यक्रममा कांग्रेस नेता डा. रामशरण महतले नेपालको लथालिंग पारा र कुसंस्कारका कारण चीनले विश्वास गर्न नसकेर भ्रमण छोट्याएको आरोप लगाउनुभयो । भ्रमण छोटो हुँदा यसले अन्तर्राष्ट्रिय स्तरमा नेपालको छवि बिगारेको र चीनले गरेको सहयोग पुरानै प्रक्रियाको निरन्तरता मात्र भएको दावी उहाँको थियो । साना साना आयोजनाका लागि पनि पैसा मागेर सरकारले चीनका अगाडि दरिद्रता देखाएको आक्षेप पनि लगाउनुभयो ।
एमाले नेता भीम रावलले भ्रमणको सूचना गोप्य राख्नु र चिनियाँ प्रधानमन्त्रीलाई विमानस्थलबाट सिहदरवारसम्म ल्याउँदा लगाएको अघोषित कफ्रयू लगाउनु सरकारको नालायकिपन भएको आरोप लगाउनुभयो । १० वर्षदेखि चिनियाँ उच्चस्तरीय भ्रमण नेपालमा नहुनुमा माओवादी द्वन्द्व नै कारक भएको आरोप लगाउँदै रावलले लडाकुको स्वेच्छिक अवकासका लागि चीनले रकम दिएकाले तत्कालै अवकासमा जानेलाई विदाई गर्न आग्रह गर्नुभयो ।
प्रधानमन्त्रीका प्रमुख राजनीतिक सल्लाहकार देबेन्द्र पौडेलले भ्रमण आकस्मिक जस्तो देखिए पनि यो चीनको चाहना अनुसार नै भएको दावी गर्नुभयो । भ्रमण हुँदा कहिँकतै स्वतन्त्रताको हनन नगरिएको जिकीर गर्नुभयो । पौडेलले अब भारतीय प्रधानमन्त्रीको भ्रमण पनि चाँडै हुने बताउनुभयो ।
अन्य समाचारहरु
