माघ ११ गते, २०६८ मा प्रकाशित
काठमाडौ, माघ ११ पेट्रोलियम पदार्थको मूल्यवृद्धिको बिरोधमा विभिन्न
राजनीतिक दल निकट युवा तथा विद्यार्थी संघ संघठनहरुले आव्हान गरेको बन्दले
राजधानी लगायत मुलुकको विभिन्न भागमा जनजीवन प्रभावित भएको छ ।
१३ विद्यार्थी र ९ युवा संगठनले संयुक्त रुपमा बन्दको आव्हान गरेका हुन् ।
सत्तापक्षीय माओवादीका भातृसंगठन पनि आन्दोलनमा सहभागी छन् ।
पूर्व घोषित आन्दोलनको कार्यक्रम अनुसार उपत्यका बन्दको मात्र आव्हान
गरिएपनि विभिन्न जिल्लाहरुमा पनि बन्द गराइएको छ । उपत्यकाका सडकहरु
विहानैदेखि सुनसान छन् । सडकमा यातायातका साधन देखिएको छैन । बन्द सफल
पार्न ठाउँ ठाउँमा युवा विद्यार्थीहरुले प्रदर्शन गरेका छन् । सडकमा बाक्लो
संख्यामा सुरक्षाकर्मी परिचालन गरिएको छ । महानगरीय प्रहरी आयुक्त
कार्यालयका प्रवक्ता एसएसपी रविराज श्रेष्ठले बन्द कर्ताले ठाउँ ठाउँमा
प्रदर्शन जारी राखेपनि बिहान ९ बजेसम्म कुनै अप्रिय घट्ना नभएको र कसैलाई
पक्राउ नगरिएको ईकान्तिपुरलाई बताए ।
आन्दोलनमा तरुण दल, वाईसीएल, युवा संघ, नेविसंघ,अनेरास्ववियू,अखिल
क्रान्तिकारी, मधेशी मोर्चामा आवद्ध विभिन्न दल निकट युवा तथा विद्यार्थी
संगठन लागायतको सहभागिता रहेको छ । ती संगठनहरुले थप आन्दोलनको कार्यक्रम
आजै घोषणा गर्ने तयारी गरेका छन् ।
सिन्धुलीमा बन्दकर्ताले एउटा यात्रुवाहक बसमा तोडफोड गरेका छन् ।
मरिनखोलाबाट सदरमुकाम आउँदै गरेको ना।४।ख २४२७ नम्वरको बस धुराबजारमा
तोडफोड गरिएको छ । सदरमुकाम तथा वीपी राजमार्गमा यातायात संचालनमा आएको छैन
।
दाङमा बन्दले जनजीवन प्रभावित भएको छ । जिल्लाभित्र र बाहिर कुनै पनि सवारी
साधन चलेका छैनन् । पूर्वपश्चिम राजमार्गको दाङ सडक खण्ड पनि पूर्णरुपमा
ठप्प भएको छ ।
गत साता सरकारले पेट्रोलियम पदार्थमा चर्को मूल्यवृद्धि गरेपछि युवा तथा
विद्यार्थी संगठनहरु मूल्यवृद्धि फिर्ता लिनुपर्ने माग गर्दै आन्दोलन घोषणा
गरेका थिए । सरकार मूल्यवृद्धि फिर्ता लिने पक्षमा नभएपनि विद्यार्थीलाई
इन्धनमा सहुलियत दिने योजना अघि सारेको छ ।
अन्य समाचारहरु
