पूर्वनिर्धारित कार्यतालिका अनुसार संविधान लेखनका विवादित विषयमा सहमति जुटाउन नसकेपछि दलहरुले संविधान लेखनको कार्यतालिकामा फेरि संशोधन गर्ने भएका छन् । विवादित विषयमा सहमति जुटाइसक्नुपर्ने समयसीमा सकिनु एक दिन अघि आज बैठकमा जुटेका दलहरु अन्ततः संविधान लेखनको कार्यतालिकामा फेरि संशोधन गर्ने निश्कर्षमा पुगेका हुन् । सभामुख सुवास नेम्वाङ र सम्बैधानिक समितिका सभापति निलाम्बर आचार्यको पहलमा आज साझ बसेको तीन ठूला दलको बैठकमा संविधान जारी गर्ने समयसीमा जेठ १४ लाई कायमै राख्दै संविधान लेखनको कार्यतालिकामा संशोधन गर्ने सहमती बनेको हो ।
यसअघि आज विहान पनि तीन दलका नेताहरुको बैठक बसेको थियो । तीनदलको बैठक लगत्तै संविधानसभामा प्रतिनीधित्व गर्ने सबै दलको बैठक बसेको थियो । बैठकमा सहभागी साना दलले सहमतीपूर्वक अघि वढ्न तीन ठूला दललाई सुझाव दिएका थिए ।
बैठकमा संविधान लेखनका सन्दर्भमा भएको प्रगती, बाँकी रहेका विवादित विषय र संविधान लेखनको समयसीमाबारे छलफल भएको थियो । संविधान लेखनको कार्यतालिका अनुसार संविधानका विवादीत विषयमा भोली सम्ममा सहमति जुटाइसक्नुपर्ने थियो । दलहरुले पटक पटक संविधान लेखनको कार्यतालिकामा संशोधन गरेपछि उनीहरुप्रति जनताको आशंका र अविश्वास बढेको छ । कार्यतालिका संशोधनको बेलामा जसरी पनि काम सक्छौ भन्ने तर त्यसपछि काममा ध्यान नदिने नेताहरुको बानीबाट जनता दिक्क बनेका छन् ।
सर्वोच्च अदालतले अन्तिम पटक आगामी जेठ १४ गतेसम्म मात्रै संविधानसभाको म्याद रहने भनि गरेको फैसला र दलहरुबीच विवाद कायमै रहेको अवस्थामा संविधान नबने मुलुकमा भयावह अवस्था आउन सक्ने भन्दै चिन्ता ब्यक्त गर्न थालिएको छ । दलहरुबीच साशकीय स्वरुप र न्याय प्रणाली लगायतका विषयमा विवाद कायमै छ । राज्यपुनर्सरचना आयोगले निर्धारित समयमा काम नसकेपछि दलहरुबीच राज्यपुनर्संरचनाको विषयमा छलफल सम्म हुन सकेको छैन ।
माघ १४ गते, २०६८ मा प्रकाशित
