सात सय ५० मेगावाट क्षमताको पश्चिम सेती जलविद्युत आयोजनाका लागि चीनको चाइना थ्रिगोर्जेज इन्टरनेशनल कर्पोरेशन संग समझदारी भएको छ । पश्चिम सेतीमा लगानी गर्ने विषयमा बुधबार अर्थमन्त्री पोष्ट बहादुर बोगटी र नेपालका लागि चिनियाँ राजदूत याङ्ग हो लानको उपस्थितीमा उर्जा मन्त्रालयका सहसचिव अर्जुनकुमार कार्कीले र थ्रिगोर्जेज कम्पनीको तर्फबाट कार्यकारी उपाध्यक्ष वाङ सावेफेङले हस्ताक्षर गर्नुभयो ।
करिब १ खर्ब २४ अर्ब बराबर रुपैयाँँको आयोजनामा थ्रिगोर्जेजको ७५ प्रतिशत र नेपाल विद्युत प्राधिकरणको २५ प्रतिशत शेयर लगानी रहने छ ।
यो आयोजना नेपालको आन्तरिक खपतको लागि हुने बताइएको छ । थ्रिगोर्जेजको ७५ प्रतिशत अधिकतम शेयर मध्येबाट आयोजना स्थलका स्थानीय जनतालाई २ देखि ५ प्रतिशत शेयर छुट्याउने भएको छ भने नेपाली प्रबद्र्धकलाई समावेश गर्न सक्ने सहमतीपत्रमा उल्लेख गरिएको छ ।
प्राधिकरणको २५ प्रतिशत शेयर वापत लाग्ने आवश्यक पूँजी चाइनाको एक्जीम बैंकबाट सहुलियत दरमा ऋण उपलब्ध गराउन समेत थ्रिगोर्जेजले सहयोग गर्ने भएको छ । यस्तै, एक्जीम बैंकबाट प्राप्त ऋण अपुग भए बाँकी ऋण समेत थ्रिगोर्जेजले उपलब्ध गराउने समझदारी भएको छ । कम्पनीले आफ्नै खर्चमा प्राविधिक, आर्थिक, वातावरणीय प्रभावको अध्ययन पुनरावलोकन गर्ने छ । आयोजनाको विद्युत राष्ट्रिय प्रसारणमा जोड्न प्रसारण लाइन निर्माणमा समेत कम्पनीले सहयोग गर्ने समझदारीमा उल्लेख छ ।
थ्रिगोर्जेजले अक्टुबर २०१४ सम्ममा हिसाव किताव सम्पन्न गरिसक्नु पर्ने छ भने आयोजना सन् २०१९ सम्ममा सम्पन्न गरिने लक्ष्य राखिएको छ । छिमेकी राष्ट्रको जलविद्युतमा चिनियाँ लगानी भित्र्याउने चीन सरकारको योजना अनुसार नै पश्चिम सेतीमा चीनले लगानी गर्न लागेको थ्रिगोर्जेजका कार्यकारी उपाध्यक्ष सावेफेङले बताउनुभयो । चीनले छिमेकी राष्ट्रमा १४ हजार मेगावाट विद्युत उत्पादन गर्ने लक्ष्य राखेको छ । समयमा नै आयोजन सम्पन्न गर्न सबै पक्षको सहयोग चाहिनेमा पनि थ्रिगोर्जेजले जोड दिएको छ ।
फाल्गुन १७ गते, २०६८ मा प्रकाशित
