राष्ट्रसंघका महासचिव मुनद्धारा सिरियाली सरकारले आफ्ना नागरिक माथि अपराध गरेको आरोप

संयुक्त राष्ट्रसंघका महासचिव बान कि मुनले सिरियाली सरकारले आफ्ना नागरिक माथि अपराध गरेको आरोप लगाउनु भएको छ । राष्ट्रसंघको साधारणसभामा बोल्दै महासचिव बानले अन्तर्राष्ट्रिय समुदाय आफ्नो कर्तव्य निभाउन असफल भएको र यसैले सिरियाली नेताहरुलाई आफ्ना नागरिक माथि दबाब बढाउन प्रोत्साहन मिलेको बताउनु भयो ।

 

तर उहांले सिरियाका विपक्षीहरुलाई सैन्य सहयोग उपलब्ध गराउनु समस्याको समाधान नभएको उल्लेख गर्नु भयो । महासचिव बानले अन्तर्राष्ट्रिय समुदायले सिरिया विरुद्ध एक मत राख्ने समय आएको बताउनु भयो । सिरियामा विपक्षी प्रदर्शनकारीले केन्द्रविन्दु बनाउदै आएको होम्स् शहरमा अन्तर्राष्ट्रिय रेडक्रसले उद्धार र राहतका लागि अनुमति पर्खिरहेका बेला बानको यो भनाई सार्वजनिक भएको हो । तर राष्ट्रसंघमा सिरियाका राजदूत बशार जाफरीले भने महासचिव बानलाई गलत सुचना दिइएको जिकिर गर्नु भएको छ ।