फाल्गुन २५ गते, २०६८ मा प्रकाशित
मन्त्रिपरिषद् कार्यालयका सचिव लिलामणि पौडेलको संयोजकत्वमा बुधबार गठित समितिमा गृहसचिव सुशिलजंग राणा, परराष्ट्र सचिव दुर्गा भट्टराई र एक जना उपन्यायधिवक्ता रहेका छन्।
छानबिन समिति गठनपछि अध्यागमन विभागले विमानस्थलमा मन्त्रीको राहदानीमा प्रस्थान छाप लगाउने एकजना नायब सुब्बालाई ‘जिम्मेवारीबाट हटाएको’ छ। त्यसैगरी अन्य केही जनासँग स्पष्टीकरण लिएको छ।
‘मन्त्रीज्यूको राहदानी जाँच नगरी डिपार्चर स्टिकर टाँस्ने नायब सुब्बा होमप्रसाद पौडेललाई जिम्मेवारीबाट हटाइएको छ,’ त्रिभुवन अन्तर्राष्ट्रिय विमानस्थलस्थित अध्यागमन कार्यालयका प्रमुख वीरवहादुर राईले भने, ‘छानबिन समिति गठन भएकोले उनलाई यो अवधिभर जिम्मेवारी नदिने निर्णय गरेका हौं।’
बिना भिसा काठमाडौंबाट जर्मनी जाने क्रममा मन्त्री मगर मंगलबार युनाईटेड अरब इमिरेट्स (युएई)को आबुधाबी अन्तर्राष्ट्रिय विमानस्थलको अध्यायगमनले पक्राउ गरी चार घण्टा हिरासतमा लिएको थियो। उनको राहदानीमा भिसा भए/नभएको जाँचै नगरी त्रिभुवन विमानस्थलका अध्यागमन कर्मचारीले ‘डिपार्चर’ भएको स्टिकर र छाप हानिदिएका थिए।
पक्राउ परेपछि आबुधाबीस्थित नेपाली दुताबासको पहल र काठमाडौंस्थित जर्मन दुताबासको सहयोगमा उनले बुधबार भिसा पाउन सकेका थिए। उनी बिहीबार बिहान बल्ल जर्मनीतर्फ प्रस्थान गरेका थिए भने अहिले उनी बर्लिनमा पुगी सकेका छन।
‘मन्त्रीज्यूको भिसा प्रक्रिया सकिएको छ। बुधबार उहाँको राहदानीमा आबुधाबीस्थित जर्मन दूतावासले भिसा लगाईदिएको छ,’ परराष्ट्र प्रवक्ता अर्जुनबहादुर थापाले भने, ‘स्थानीय समयअनुसार बिहीबार बिहान २ बजे उहाँ आबुधाबीबाट जर्मनीतर्फ उड्नु हुनेछ।’
मन्त्री मगरले परराष्ट्रबाट भिसा नोट लिएपछि त्यसैलाई भिसा मानेर सोमबार श्रीमतीसहित काठमाडौंबाट उडेका थिए। स्रोतका अनुसार मन्त्री मगरकी श्रीमतीले भिसाको लागि पहिलो पटक प्रयास गर्दा जर्मन दूतावासले भिसा दिन अस्वीकार गरेको थियो।
अन्य समाचारहरु
