प्रधानमन्त्री केपी शर्मा ओलीले प्रमुख प्रतिपक्षी दल नेपाली कांग्रेसले असहयोग गरे सरकार आफ्नै तालमा अगाडि बढ्ने बताएका छन् ।
नेकपा एमाले काभ्रेको नवौं जिल्ला अधिवेशनको शनिबार उद्घाटन गर्दै प्रधानमन्त्री ओलीले प्रमुख प्रतिपक्षी दल नेपाली कांग्रेस गैरजिम्मेवार बन्न थालेको भन्दै उसलाई अब धेरै समय कुरेर बस्न नसक्ने स्पस्ट पारे ।
उनले कांग्रेसले असहयोग जारी राखे सरकार आफ्नै गतिमा अघि बढ्ने र अवरुद्ध संसद पनि खुलाउने दाबी गरे ।
पुनःनिर्माण प्राधिकरण गठनसम्बन्धी विधेयक संसदबाट पास भएपछि संविधान संशोधनको प्रक्रिया पनि सुरु हुने उनको भनाइ थियो ।
प्रधानमन्त्री ओलीले संविधानका बारेमा तराईका जनतामा परेको भ्रम चिर्न सरकारले अभियान सुरु गरिसकेको पनि बताए ।
उनले सरकारले विकास निर्माणका कामलाई पनि प्राथमिकतामा राखेको भन्दै हावा र सोलारबाट बिजुली निकालेर भएपनि एक वर्षभित्र देशलाई लोडसेडिङमुक्त बनाउने प्रतिबद्धता व्यक्त गरे । – इमेजखबरमा समाचार छ ।
मंसिर २६ गते, २०७२ मा प्रकाशित
