अन्तर्राष्ट्रिय बजारमा इन्धनको मूल्य निरन्तर घट्दै गइरहेको भन्दै प्रधानमन्त्री तथा मन्त्रीपरिषद् कार्यालयले नेपाल आयल निगमलाई पेट्रोलियम पदार्थको मूल्य घटाउन निर्देशन दिएको छ । साथै, मन्त्रालयले यातायात व्यवस्था विभागलाई सार्वजनिक सवारी साधनको भाडा घटाउन पनि निर्देशन दिएको छ ।
प्रधानमन्त्री मन्त्री तथा मन्त्रीपरिषद् कार्यालयले बिहीबार आपूर्ति मन्त्रालयमार्फत निगमलाई अन्तर्राष्ट्रिय बजारमा इन्धनको मुल्य घट्दै गइरहेकोले स्वचालित मूल्य प्रणाली अनुसार मुल्य समायोजन गर्न निर्देशन दिएको हो । अन्तर्राष्ट्रिय बजारमा बुधबार कच्चा तेलको मुल्य ३२ डलरमा झरेको छ ।
कार्यालयले सार्वजनिक सवारी साधनको भाडा घटाउन पनि भौतिक पूर्वाधार तथा यातायात मन्त्रालयमार्फत यातायात व्यवस्था विभागलाई निर्देशन दिएको छ । प्रधानमन्त्री तथा मन्त्रिपरिषदको कार्यालयको निर्णय अनुसार आयल निगमलाई मूल्य घटाउन लिखित निर्देशन दिएका छौं, प्रधानमन्त्री तथा मन्त्रिपरिषद कार्यालयका प्रवक्ता उत्तरकुमार खत्रीले कान्तिपुरसँग भने ।
अन्तर्राष्ट्रिय बजार र नेपाली बजारमा इन्धनको मूल्य घटे पनि सवारीसाधनको भाडा नघटाइएपछि निर्देशन दिएको प्रवक्ता खत्रीले बताए । कान्तिपुरमा समाचार छ ।
माघ २१ गते, २०७२ मा प्रकाशित
