प्रधानमन्त्री केपी ओलीले संविधान जारी गर्न नदिन ‘कु’ गर्नेसम्मको प्रयास भएको यतिबेर खुलासा हुन थालेको बताएका छन् । कान्तिपुरमा समाचार छ ।
पूर्वराष्ट्रपति रामवरण यादवले बिहीबार राजधानी दिएको अभिव्यक्तिप्रति संकेत गर्दै प्रधानमन्त्री ओलीले त्यसबेला संविधान जारी गर्नै पर्छ भन्ने आफूहरुको अडान कति महत्वको रहेछ भन्ने अहिले पुष्टि भएको बताए ।
संविधान बन्न नदिने कत्रो प्रयत्न भएको रहेछ, हिजो (बिहिबार) मात्र एकजना व्यक्तिको अभिव्यक्तिबाट खुलासा भएको छ, कम्यूनिष्ट पार्टी स्थापनाको ६८ औ बर्ष पुगेको अवसरमा एमालेद्वारा आयोजित कार्यक्रमलाई सम्बोधन गर्दै ओलीले भने, कु गर्ने सम्मको कुरा रहेछ, संविधान जारी गर्नु कति महत्वको रहेछ भन्ने अहिले सावित भएको छ ।
पूर्वराष्ट्रपति यादवले संविधान प्रक्रियामा आफूलाई धेरै चित्त नबुझेको बताएका थिए । त्यसबेला राष्ट्रिय सहमति नभइ राजनीतिक सहमतिले मात्र संविधान बनेको यादवको धारणा थियो । त्यस्तो अवस्थामा आफू बाहेक अन्य कोही पदमा भएको भए २०१७ सालमा राजा महेन्द्रले जस्तै ‘कु’ गर्न सक्ने अवस्था रहेको यादवले बताएका थिए ।
प्रधानमन्त्री ओलीले संविधान जारी भइसकेकोले अब यसको कार्यान्वयनका लागि मिलेर जान सबै राजनीतिक दलहरुलाई आग्रह गरे । आन्दोलनरत मधेसी दलहरुलाई पनि संवादमा आउन पुन: आग्रह गरे । सही विचारको पक्षमा सबै मिलेर जान सकिने आधार संविधानले नै प्रदान गरेको भन्दै ओलीले वार्तामा बस्न आहु्वान गरेका हुन् । उनले काग्रेसलाई पनि सहमति तोडेर गए पनि अब मिलेर जान सकिने भन्दै सहमतिमा आउन आग्रह गरे । हामी पनि सरकारमा थियौं, तर एमालेलाई केही पनि नदिने सबै आफैं मात्र लिने गरी अघि बढ्न खोजियो, सहमति तोडियो, प्रधानमन्त्री ओलीले भने, अहिले अलि अलि पिर परेको जस्तो देखियो । एमाले खुलस्त छ आउनुहोस् आफ्ना कुरा भन्नुहोस् । उनले प्रधानमन्त्री चयन हुनेबेलामा आफूलाई मत हाल्नेलाई पछुतो हुन नदिने प्रतिबद्धता गरेको उल्लेख गर्दै त्यो प्रतिबद्धतालाई कमजोर हुन नदिएको दाबी गरे ।
कार्यक्रममा एमालेका अर्का नेता माधवकुमार नेपालले महत्वपूर्ण राजनीतिक उपलब्धीहरु हासिल भएकाले अब ती उपलब्धीहरुलाई जोगाउदै अघि बढ्नुपर्ने बताए । अहिलेको चुनौतीहरु समाना गर्नका लागि पार्टी भित्रको आन्तरिक एकतालाई अझै मजबुत बनाउनुपर्ने उनको जोड थियो । अब आर्थिक समृद्धिका लागि कम्यूनिष्ट पार्टीले अगुवाई गर्नुपर्ने बेला आएको उल्लेख गर्दै नेता नेपालले त्यसअनुसार पार्टीलाई गतिशिल बनाउनुपर्ने धारणा राखे ।
एमाले महासचिव ईश्वर पोखरेलले संविधानले महत्वपूर्ण उपलब्धीहरु संस्थागत गरेको उल्लेख गर्दै अब त्यसलाई कार्यान्वयन हुन नदिने षड्यन्त्र भइरहेको बताए । त्यस्ता षड्यन्त्रहरुलाई परास्त गर्नै अघि बढ्नुपर्ने उनको धारणा थियो । हाम्रो स्वाभिमानमाथि बालात्कार गर्न खोजिएको छ
बैशाख ११ गते, २०७३ मा प्रकाशित
