युवा संघ नेपालका रुपन्देही जिल्ला अध्यक्ष दुर्गा तिवारीको सोमबार रुपन्देहीमा गोली हानी भएको हत्यामा प्रमुख प्रतिपक्षी नेकपा एमालेले प्रधानमन्त्री तथा गृहमन्त्रीलाई तानेको छ।
‘प्रधानमन्त्री पुष्पकमल दाहाल स्वयंले नेकपा (एमाले) र आन्दोलनरत जनताविरुद्ध उत्तेजनापूर्ण अभिव्यक्ति दिइरहेको तथा गृहमन्त्रीले उक्साहटपूर्ण भनाइ राखिरहेको बेला देशभक्त युवा नेताको हत्या भएको छ,’ महासचिव ईश्वर पोखरेलद्वारा जारी विज्ञप्तिमा भनिएको छ।
विज्ञप्तिमा अप्रत्यक्ष रुपमा प्रधानमन्त्री र गृहमन्त्रीले उक्साएर यस्तो घटना भएको आरोप पनि लगाइएको छ। ‘देश र जनताको सुरक्षा गर्नुपर्ने व्यक्तिहरुको त्यस्तो उत्तेजना र उक्साहटपूर्ण अभिव्यक्ति सार्वजनिक भएकै बेला यो देशभक्त नेपालीहरुमाथि गरिएको षड्यन्त्रपूर्ण आक्रमण हो। आन्दोलनकारी युवा नेताको हत्या गरेर एकातर्फ उक्त आन्दोलनलाई कमजोर बनाउने र अर्कातर्फ साम्प्रदायिक सद्भाव विथोलेर मुलुकमा विखण्डन सिर्जना गर्न गम्भीर आपराधिक षड्यन्त्र भइरहेको गम्भीर आशंका पैदा भएको छ,’ विज्ञप्तिमा भनिएको छ।
‘हत्या र षड्यन्त्रको पर्दाफास गर्दै संयम र धैर्यका साथ राष्ट्र, राष्ट्रियता, संविधान कार्यान्वयन र अग्रगमनको यात्रामा अविचलित सक्रियताका साथ लागिरहन कार्यकर्ता पंक्तिलाई हाम्रो पार्टी आग्रह गर्दछ,’ विज्ञप्तमा उल्लेख छ। सेतोपाटीमा समाचार छ ।
पौष ४ गते, २०७३ मा प्रकाशित
