नेकपा एमालेका अध्यक्ष केपी ओलीले संविधान संशोधन प्रस्ताव कुनै हालतमा पारित हुन नदिने बताएका छन् ।
एमालेसहित विपक्षी ९ दलले शुक्रबार काठमाडौंमा गरेको शक्ति प्रदर्शनपछिको सभामा ओलीले सरकारले ल्याएको संविधान संशोधन प्रस्ताव राष्ट्रहितविपरीत रहेको भन्दै पारित हुन नदिने दाबी गरेका हुन् । काठमाडौं उपत्यका र राजधानीमा जागेको यो जागरणलाई देशव्यापी रुपमा फैलाउँछौं । राष्ट्रहितलाई तलमाथि हुन दिँदेनौं । संसदमा यो हैसियतसहित एमाले छ उनले भने, हामी राष्ट्रियहितविपरीतको संशोधन प्रस्ताव पारित हुन दिँदैनौं ।
अहिलेको संविधान संशोधनको प्रस्ताव जनताको माग र आवश्यकताले नआएको भन्दै ओलीले अन्यत्र कसैका आदेश पालना गर्न ल्याइएको आरोप लगाए । उनले भाषाका विषयमा गर्न खोजिएको संशोधनले नेपाली भाषा र मातृभाषालाई विस्थापित गर्ने पनि दाबी गरे । यहाँको भोजपुरी, मैथिली लगायत भाषालाई समाप्त पार्न र हिन्दीलाई स्थापित गर्न संशोधन गर्न ल्याइएको हो उनले भने, अन्त्यतै गम्भीर षड्यन्त्रका साथ यो प्रस्ताव ल्याइएको छ । यो प्रस्तावले मुलुकलाई निर्वाचनतर्फ लैजान कुनै सहयोग पुर्याउँदैन ।
उनले हिजो संविधान जारी गर्न नदिने र संविधान च्यात्नेहरु अहिले संशोधनको कुरा गरिरहेको टिप्पणी गरे । नेपाल हिजो पनि जिउँदो र स्वतन्त्र राष्ट्र थियो, आज पनि छ । भोलि पनि यसलाई यस्तै रहन्छ
पौष २२ गते, २०७३ मा प्रकाशित
