आगामी तीन दिनसम्म देशका अधिकांश स्थानमा हल्कादेखि मध्यमखालको तथा केही स्थानमा भारी वर्षाको सम्भावना रहेको मौसम पूर्वानुमान महाशाखाले जनाएको छ ।
महाशाखाले तीन दिनको मौसम पूर्वानुमानसम्बन्धी विज्ञप्ति जारी गर्दै देशभर समान्यदेखि पूर्णबदली रही अधिकांश स्थानमा वर्षाको सम्भावना औंल्याएको हो ।
शनिबार दिउँसो देशभर समान्यदेखि पूर्णबदली रही अधिकांश स्थानमा मध्यमदेखि भारी वर्षाको सम्भावना छ ।
रातको समयमा पनि देशभर बदली रही पूर्व र मध्यका अधिकांश स्थानमा तथा पश्चिमका केही स्थानमा वर्षा हुने जनाइएको छ । साथै, पूर्व र मध्यका केही स्थानमा भारी वर्षाको पनि सम्भावना छ ।
आइतबार दिउँसो र रातको दुवै समयमा देशभर सामान्यदेखि पूर्णबदली रही देशको अधिकांश स्थानमा हल्कादेखि मध्यमखालको वर्षा तथा एक/दुई स्थानमा भारी वर्षाको सम्भावना रहेको छ ।
असार १४ गते पनि देशभर बदली रही केही स्थानमा हल्कादेखि मध्यमखालको वर्षा हुनुका साथै एक/दुई स्थानमा भारी वर्षाको सम्भावना रहेको महाशाखाले जनाएको छ ।
शनिबार काठमाडौं उपत्यकासहित देशका अधिकांश भेगमा बदलीसहित वर्षा भइरहेको छ । काठमाडौंका कतिपय स्थानमा भारी वर्षा भएको छ ।
यद्यपि, दिनभरको वर्षाको विवरण मौसम पूर्वानुमान महाशाखाले साँझ राख्ने भएकाले अहिले देशका कुन क्षेत्रमा कति वर्षा भएको भनी रेकर्ड छैन ।
महाशाखाको पछिल्लो विवरणअनुसार शनिबार काठमाडौंमा ३.५ मिलिमिटर वर्षा भएको छ ।
ताप्लेजुङ र ओखलढुंगामा ६, सिमरामा १६, पोखरामा २५, दाङमा १४, नेपालगन्जमा ३४, धनगढीमा ११ र डडेलधुरामा ३० मिलिमिटर वर्षा भएको छ ।
काठमाडौंको अधिकतम् तापक्रम २९.५ र न्यूनतम् तापक्रम २१ डिग्री सेल्सियस रहेको छ ।
नदी तटीय क्षेत्रमा सतर्कता अपनाउन आग्रह
निरन्तरको वर्षाले देशका प्रमुख नदीमा बाढीको सम्भावना रहेकाले नदी तटीय क्षेत्रमा सामान्य सतर्कता अपनाउन आग्रह गरिएको छ ।
जल तथा मौसम विज्ञान विभागअन्तर्गतको बाढी पूर्वानुमान शाखाले आगामी तीन दिनसम्मको बाढी बुलेटिन सार्वजनिक गर्दै नदीमा बहाब खतराभन्दामाथि रहनसक्ने भएकाले सतर्कता अपनाउन आग्रह गरेको हो ।
शनिबार देशका प्रमुख नदी कन्काई, कोसी, कमला, पश्चिम राप्ती, बबईलगायतमा जलसतह उल्लेख्य बढ्ने भएकाले नदी तटीय क्षेत्रमा सतर्कता अपनाउन भनिएको छ ।
कर्णाली, महाकाली र यसका शाखा नदीमा बहाब खतराभन्दामाथि रहने सम्भावना नरहे पनि आइतबार बिहानसम्म कन्काई, कमला, बाग्मती, पश्चिम राप्ती, बबईलगायतका नदीमा बहाब उल्लेख्य बढ्ने पूर्वानुमान गरिएको छ ।
आइतबार बिहान प्रमुख नदीमा बहाब बढ्दोक्रममा हुने तथा कन्काई, कमला, बागमती, कोसी र यसका शाखा नदीमा बहाब उल्लेख्य बढ्ने तर खतराभन्दा तलै हुने तथा पूर्व र मध्य भागको चुरे र पहाडबाट बहने साना नदीमा आकस्मिक बाढी आउनसक्ने सम्भावना भने कायमै रहेको शाखाको पूर्वानुमान छ ।
शनिबार, आइतबार र सोमबार खासगरी पूर्व र मध्य भागको चुरे र पहाडबाट बहने साना नदीमा बाढीको सम्भावना रहेको छ ।
पहिरो जानसक्ने स्थानमा पनि सतर्कता खपनाउन पनि महाशाखाले अनुरोध गरेको छ । रासस
श्रावण १२ गते, २०७५ मा प्रकाशित
