अर्घाखाँचीमा विप्लव नेतृत्वको नेकपाले गरेको बन्दको पुर्णप्रभाब

सन्धिखर्क, अर्घाखाँची ३० फाल्गुन । अर्घाखाँचीमा नेत्रविक्रम चन्द विप्लव नेतृत्वको नेकपाले गरेको बन्दको प्रभाव परेको छ । 

सरकारले प्रतिबन्ध लगाएसंगै आक्रामक बनेको नेकपाले पूर्वघोषित संघर्षका कार्यक्रम अनुरुप  आज नेपाल बन्दको घोषणा गरेको हो । बन्दका कारण छोंटो दुरीका गाडी फाट्फुट चलेपनी  लामो दुरीका गाडी चलेका छैनन । बन्दका कारण सदरमुकाम सन्धिखर्क लगायत जिल्लाभरको व्यवसाय र पठनपाठन पनी प्रभावित भएको छ ।

हिंजो प्रेस विज्ञप्ती जारी गर्दै नेकपाले बन्द कार्यक्रममा असहयोग गर्नेलाई भौतिक कारबाही गर्ने चेतावनी दिएको थियो । 

बिप्लप नेकपा अर्घाखाँचीका जिल्ला इन्चार्ज कमल केसीले प्रेस विज्ञप्ति जारी गर्दै जिल्लाबासीलाई आफ्ना बन्द लगायत पूर्वघोषित संघर्षका कार्यक्रमलाई सहयोग गर्न अनुरोध पनी गर्नुभएको छ । 

यसैबिच विप्लप समुहको बन्दलाई मध्यनजर गर्दै अर्घाखाँचीमा सुरक्षा व्यवस्था कडा बनाइएको छ । ठाउँठाउँमा गस्ति खटाउने, कुनै खतरा हुनासाथ प्रहरी तुरुन्त उपस्थित हुनेगरी व्यवस्था गरिएको जिल्ला प्रशासन कार्यालयले जनाएको छ । 

सरकारले नेत्रविक्रम चन्द ‘विप्लव’ समूहको गतिविधिमाथि प्रतिबन्ध लगाएसँगै सुरक्षा सतर्कता बढाएको हो ।