अर्घाखाँचीडट्कम संवाददाता
सन्धिखर्क, अर्घाखाँची । अर्घाखाँची जिल्ला भित्र र बाहिर लामो दूरीको यातायातहरु आगामी असोज ५ गतेदेखि संचालनमा आउने भएका छन् ।
अर्घाखाँचीका यातायात व्यवसायीहरुले जिल्ला भित्र र बाहिर लामो दूरीको यातायातहरु आगामी असोज ५ गते सोमबारदेखि संचालन गर्ने भएका हुन् ।
यसअघि यातायात व्यवसायीहरुले अर्घाखाँची जिल्लामा यही हप्ताको विहिबार अर्थात आगामी असोज १ गतेदेखि यातायात व्यवसायीहरुले सबै सार्वजनिक सवारी साधन सञ्चालन गर्ने तयारी गरेका थिए ।
पश्चिम नेपाल बस व्यवसायी संघ, देउराली यातायात लगायत संघसंस्थाले जानकारी गराए अनुसार विश्वकर्मा पुजाको दिनको सट्टा अर्को हप्ताको सोमबार अर्थात आगामी असोज ५ गतेदेखि जिल्ला भित्र र बाहिर सबै सार्वजनिक सवारी साधन सञ्चालन गरिने भएका हुन् ।
उता यसअघि काठमाडौंमा पनि यातायात व्यवसायी, यातायात व्यवस्था विभाग र तीन वटा मजदुर संगठनको संयूक्त बैठकमा व्यवसायी र मजदुर संगठनले यातायात खुलाउन सहजीकरण नगरे असोज १ देखि लामो तथा छोटो दुरीका यातायात चलाउने घोषणा गरेका थिए ।
यस्तै सोमबार साँझ प्रधानमन्त्री निवास बालुवाटारमा बसेको मन्त्रिपरिषदको बैठकले गत चैत महिनादेखि कोरोना महामारीका कारण रोक लगाउँदै आएको लामो दूरी र आन्तरिक उडान खुला गर्ने निर्णय गरेको छ । यसअघि भदौ २५ गतेदेखि छोटो दूरीको यातायात जोर बिजोर प्रणालीअनुसार खुला गरेको थियो।
सरकारले चैत ११ गतेदेखि कोरोना भाइरसको रोकथामका लागि लक डाउन गर्दा सार्वजनिक यातायात प्रभावित भएको थियो।
भाद्र ३० गते, २०७७ मा प्रकाशित
