अर्घाखाँचीडट्कम संवाददाता
सन्धिखर्क, अर्घाखाँची (अर्घाखाँचीडट्कम) । अर्घाखाँची जिल्लामा मास्क नलगाउने यात्रुले सार्वजनिक सवारी साधनमा यात्रा गर्न नपाउने भएका छन् ।
जिल्लाभर प्रहरीले मास्क नलगाउने यात्रुले सार्वजनिक सवारी साधनमा यात्रा गर्न नदिने भएको हो ।
दशैं र तिहारको भीडभाडलाई मध्यनजर गरी गोरुसिङे – सन्धिखर्क सडक खण्ड लगायत जिल्लाभर सवारी साधनमा बस्नेले अनिवार्य मास्क लगाउन पर्नेछ ।
यस्तै सिटमा क्षमताअनुसार मात्रै यात्रु राख्न, सबै यात्रुले अनिवार्यरूपमा मास्क लगाउन, मास्क नलगाएका यात्रुलाई सवारी साधानमा प्रवेश रोक लगाउन, चालक सहचालकले अनिवार्यरूपमा मास्क, भाइजर र पञ्जा लगाउन, सवारी साधनको ढोकामा अनिवार्यरूपमा स्यानिटाइजर राख्न, सवारी साधनलाई अनिवार्यरूपमा दैनिक स्यानिटाइज गर्न भनिएको छ ।
यस्तै प्रहरीले चाडवाडको बेला हुनसक्ने सम्भावित जोखिबाट बच्न पनि अनुरोध गरेको छ । यस्तै आधिकारिक काउन्टरबाट टिकट काटी यात्रा गर्न र सवारी साधनको छतमा यात्रु नराख्न पनि निर्देशन गरिएको छ ।
उता जिल्लाको सदरमुकाम सन्धिखर्कको शान्ति बगैंचा, चुत्राबेसीको भक्तीटोला, ठाडा, खन, नरपानी, खिल्जी लगायत जिल्लाभर बिजया दशमी तथा शुभ दिपावलीलाई ध्यानमा राखेर प्रहरीले यात्रु सहायता कक्ष स्थापना गरेको छ।
आश्विन १५ गते, २०७८ मा प्रकाशित
