अब कांग्रेस प्रतिपक्ष होइन सत्तापक्ष हो : संविधानविद् डा. भीमार्जुन आचार्य

काठमाडौँ– कांग्रेसले प्रधानमन्त्री प्रचण्डलाई विश्‍वासको मत दिने निर्णय लिएपछि संविधानविद् डा. भीमार्जुन आचार्यसँग प्रधानमन्त्री प्रचण्डलाई विश्वासको मत दिने निर्णय गरेको कांग्रेसलाई प्रमुख प्रतिपक्ष दल भन्न मिल्छ कि मिल्दैँन ? भनेर सोध्यो : आचार्यको भनाइ जस्ताको त्यस्तै प्रस्तुत गरेका छौँ :

संसदीय शासन प्रणाली भनेको बलियो प्रतिपक्षसहितको शासन प्रणाली हो । बलियो प्रतिपक्ष भएमा सत्तापक्षमा भएकाले जथाभावी काम गर्न नपाउने, जवाफदेहिता रहने र प्रत्येक काममा खबरदारी रहने मान्यता छ । प्रतिपक्षविहीन सरकारको संविधानले परिकल्पना नगरेको हुनाले यो कुरा सत्ताका लागि राजनीति गरेको जस्तो मात्रै देखिन्‍छ ।

सरकारको पक्षमा मतदान गर्नु भनेको प्रतिपक्ष नभएर सत्तापक्ष नै भन्नुपर्छ । संविधानमा बलियो प्रतिपक्षको परिकल्पना गरिएको छ । प्रतिपक्ष बिनाको संसदीय शासन प्रणाली कल्पना नै गरिदैँन । संविधानको प्रावधान मात्रै नभएर भावना पनि यही हो । यी कुरा प्रतिनिधित्व गर्ने दलहरूले बुझ्नुपर्छ । यो कुराले भागबण्डाको स्वार्थलाई दर्शाएको छ । सत्तामा बस्नेभन्दा प्रतिपक्षमा बस्नेको भूमिका बढी भएको र सबैले समर्थन गरेमा संविधान नबुझेको भन्ने सन्देश जान्छ ।

सरकारलाई समर्थन गरेपछि वैधानिक रूपले प्रतिपक्ष भन्न मिल्दैन। सरकारलाई समर्थन पनि गर्ने र प्रतिपक्षमा पनि रहने दोहोरो चरित्र देखाउन गर्न मिल्दैन । यो दोहोरो मापदण्ड हो र गलत हो । समर्थन गर्ने, प्रतिपक्षमा बस्छु भन्ने एउटा लज्जाको विषय हो । त्यसलाई सत्तापक्ष भनिन्छ, प्रतिपक्ष होइन ।-इ कागज