जेष्ठ ५ गते, २०८२ मा प्रकाशित
अर्घाखाँची जेठ ४ — भूमिकास्थान–९ स्थित श्री भगवती माध्यमिक विद्यालय, डेभामा सचेतना, सुशासन, शैक्षिक गुणस्तर तथा नतिजा सुधारसम्बन्धी अन्तरक्रिया कार्यक्रम भव्य रूपमा सम्पन्न भएको छ।
सामाजिक विकास डिभिजन कार्यालय, तौलिहवा कपिलवस्तुको आयोजनामा सम्पन्न सो कार्यक्रममा विद्यालय व्यवस्थापन समिति, शिक्षक अभिभावक संघ, सम्पूर्ण शिक्षक–शिक्षिका तथा कक्षा ८, ९, १० र ११ का विद्यार्थीहरूको उल्लेखनीय उपस्थिति रहेको थियो।
शैक्षिक सत्रको प्रारम्भमै आयोजना गरिएको उक्त कार्यक्रम अत्यन्त फलदायी, चेतनामूलक र प्रभावकारी बनेको सहभागीहरूको भनाइ छ।
कार्यक्रममा सामाजिक विकास डिभिजन कार्यालयका प्रमुख हरिलाल आर्यालले सम्बोधन गर्दै, “शिक्षक, विद्यार्थी, अभिभावक तथा विद्यालय व्यवस्थापन समितिसहित सबै सरोकारवालाहरू आ–आफ्नो जिम्मेवारी इमानदारीपूर्वक पूरा गर्न सके विद्यालयको शैक्षिक गुणस्तर र नतिजामा उल्लेखनीय सुधार ल्याउन सकिन्छ,” भन्ने धारणा व्यक्त गर्नुभयो।
कुशल प्रशिक्षकको संयोजनमा सञ्चालित अन्तरक्रिया कार्यक्रममा सहभागीहरूले आफ्ना अनुभव, चुनौती र सम्भावित समाधानका उपायहरू खुलेर प्रस्तुत गरेका थिए।
विद्यालय व्यवस्थापन समितिका पदाधिकारीहरूले यस्ता कार्यक्रमले विद्यालयमा सकारात्मक ऊर्जा सिर्जना गर्ने विश्वास व्यक्त गर्दै आगामी दिनमा समेत निरन्तरता दिनुपर्नेमा जोड दिएका छन्। कार्यक्रम समापन गर्दै विद्यालय प्रशासनले सहभागी सबैप्रति आभार प्रकट गरेको थियो।
अन्य समाचारहरु
