आषाढ़ २३ गते, २०८२ मा प्रकाशित
काठमाडौँ । गाजा पट्टीमा आइृतवार इजरायली आक्रमणमा कम्तिमा ४३ प्यालेस्टिनीहरू मारिएको गाजाको नागरिक रक्षा विभागले जनाएको छ । प्रत्यक्षदर्शीहरूकाअनुसार इजरायली युद्धक विमानहरूले गाजा शहरको अल–नासर र शेख रदवान छिमेकमा रहेका दुई घरहरूमा आक्रमण गरेका थिए । नागरिक रक्षा विभागका प्रवक्ता महमूद बसालले बताएअनुसार दुई हवाई आक्रमणमा बालबालिका र महिलासहित २५ जनाको मृत्यु भएको छ ।
अन्य धेरै जना घाइते भएका छन् । बसालले पूर्वी गाजा शहरको अल–तुफाह छिमेकमा रहेको आवासीय घरमा इजरायली आक्रमण हुँदा चार प्यालेस्टिनीहरू मारिएका छन् भने शेख रदवान छिमेकमा विस्थापित व्यक्तिहरूलाई आश्रय दिने पालमा इजरायली आक्रमणमा तीन जनाको मृत्यु भएको छ ।
बसालकाअनुसार खान युनिसको पश्चिममा रहेको अल–मावासी क्षेत्रमा विस्थापित प्यालेस्टिनीहरूलाई बसोवास गर्ने पालहरूमा छुट्टाछुट्टै इजरायली हवाई आक्रमणमा पनि दश जनाको मृत्यु भएको छ । यसैबीच बसलले दक्षिणी गाजा पट्टीको रफाहको उत्तरपश्चिममा रहेको अल–शाकुश क्षेत्रमा इजरायली सेनाको गोलीबारीमा एक प्यालेस्टिनीको मृत्यु भएको र केही अन्य घाइते भएको बताउनु भयो ।
इजरायलले मार्च १८ मा गाजामा आफ्नो सैन्य अभियान पुनः शुरु गरेदेखि कम्तिमा ६ हजार ८ सय ६० प्यालेस्टिनीहरू मारिएका छन् । २४ हजार २ सय २० जना घाइते भएका छन् । अक्टोबर २०२३ मा द्वन्द्व शुरु भएदेखि गाजामा मृत्यु हुनेको संख्या ५७ हजार ४ सय १८ पुगेको छ । जसमा कुल १ लाख ३६ हजार २ सय ६१ जना घाइते भएका छन् ।
अन्य समाचारहरु
