श्रावण २ गते, २०८२ मा प्रकाशित
काठमाडौँ । युलिया स्वीरिडेन्को युक्रेनको नयाँ प्रधानमन्त्री बनेकी छिन् । राष्ट्रपति भोलोदिमिर जेलेन्स्कीको सिफारिसमा उनको नाम युक्रेनी संसदले अनुमोदन गरेको हो ।
युलिया यसअघि उपप्रधानमन्त्री र अर्थमन्त्री थिइन् । ३९ वर्षकी युलिया पेशाले अर्थशास्त्री हुन् । उनले २०२० देखि प्रधानमन्त्री पद सम्हालेका डेनिस श्मीहालको स्थान लिएकी छिन् ।उपप्रधानमन्त्रीको रूपमा, स्वीरिडेन्कोले यस वर्ष अमेरिकी राष्ट्रपति ट्रम्पसँग खनिज सम्झौता सम्पन्न गर्न महत्त्वपूर्ण भूमिका खेलेकी थिइन्, त्यसपछि उनको अत्यधिक प्रशंसा भएको थियो ।
त्यस्तै नयाँ मन्त्रिपरिषद्मा केही अन्य परिवर्तनहरू भएका छन् । श्मीहाल अझै पनि मन्त्रिपरिषद्मा रहनेछन् । राष्ट्रपति जेलेन्स्कीले एक दिन अघि पुरानो मन्त्रिपरिषद् विघटन गरेका थिए । यसपछि, उनले नयाँ सरकारका लागि आफ्ना छनोट गरिएका व्यक्तिहरूको सूची संसदलाई दिएका थिए ।
जेलेन्स्कीको पार्टी ‘सर्भेन्ट अफ द पिपुल’ २०१९ देखि २५४ सिटसहित पूर्ण बहुमतमा छ । युलियाले २६२ सांसदको समर्थन पाएकी थिइन् भने २२ जनाले उनको विपक्षमा मतदान गरेका थिए । साथै, २६ सांसदले मतदान गरेनन् ।
संसदमा बोल्दै जेलेन्स्कीले पूर्व प्रधानमन्त्री श्मीहाललाई धन्यवाद दिँदै अमेरिका जस्ता देशहरूसँग नयाँ सम्झौता गर्न अब नयाँ रणनीति आवश्यक रहेको बताए । उनले सरकारले सबै पुराना रक्षा सम्झौताहरूको समीक्षा गर्नुपर्छ र नयाँ रक्षा सहयोग तयार गर्नुपर्ने बताएका छन् ।
अन्य समाचारहरु
