श्रावण ११ गते, २०८२ मा प्रकाशित
प्रेरणादायी अभियान चलाउदै कपिलवस्तुका युवा अमृत गिरी
कपिलवस्तु – कपिलवस्तु जिल्लाका २० वर्षीय अमृत गिरी आजका युवाहरूका लागि एक प्रेरणाका स्रोत बनिरहेका छन् । उनी प्रारम्भमा धेरै नेपाली युवाहरू जस्तै विदेश जाने सपना देख्थे । कक्षा १२ सकेपछि विदेश जाने तयारीमा रहेका अमृतले समयमै आफ्नो सोच परिवर्तन गर्दै नेपालमै बसेर समाजको सेवा गर्ने दृढ अठोट गरे । उनी बुझ्थे कि समाजमा परिवर्तन ल्याउनको लागि विदेश जानैपर्छ भन्ने सोच गलत हो । त्यसैले उनले आफ्नै भूमि, आफ्नै समाजमा केही सकारात्मक कार्य गर्ने लक्ष्य लिए ।
आफ्नो सोचलाई व्यवहारमा उतार्ने क्रममा अमृतले ‘ग्यालेक्सी युथ क्लब’ नामक सामाजिक संस्था स्थापना गरे । यो क्लबमार्फत उनले युवाहरूलाई एकीकृत गर्दै विविध सामाजिक क्रियाकलाप सञ्चालन गर्न थालेका छन् । क्लबको प्रमुख उद्देश्य समाजमा चेतना फैलाउने, समस्याहरूको समाधान खोज्ने र युवाहरूलाई रचनात्मक कार्यतर्फ अग्रसर गराउने हो ।
अमृतको नेतृत्वमा सञ्चालन भएका सामाजिक कार्यक्रमहरूमध्ये ‘सफा कपिलवस्तु अभियान’ अहिले निकै चर्चामा रहेको छ । यस अभियानमार्फत उनले कपिलवस्तुको विभिन्न क्षेत्रहरूमा नियमित सरसफाइ कार्यक्रम सञ्चालन गर्दै आएका छन् । यसले न केवल शहरलाई सफा राख्न मद्दत गरेको छ, तर स्थानीयवासीमा पनि सरसफाइप्रतिको चेतना विकास गरेको छ ।
त्यस्तै, उनले क्यान्सर पीडितहरूका लागि सहयोग संकलन गरी उनीहरूको उपचारमा राहत पुर्याउने काम गरेका छन् । उनले अनाथ बालबालिकाहरूलाई पनि आफ्नो माया र सहयोग प्रदान गर्दै आएका छन्, जुन कार्यले समाजमा मानवीयताको राम्रो उदाहरण प्रस्तुत गरेको छ ।
प्रत्येक शनिबार उनी ‘जनचेतना कार्यक्रम’ सञ्चालन गर्छन्, जसमा सरोकारवालाहरूको सहभागिता गराई समाजमा शिक्षा, स्वास्थ्य, वातावरण र युवाको भूमिका जस्ता विविध विषयमा बहस र छलफल गरिन्छ । यसले युवाहरूलाई सामाजिक उत्तरदायित्वप्रति सजग गराउने काम गरिरहेको छ ।
अमृतको अथक मेहनत, इमान्दारिता र समाजप्रतिको निःस्वार्थ समर्पणले गर्दा आज उनी कपिलवस्तुका युवाहरूबीच मात्र होइन, सम्पूर्ण जिल्लावासीका लागि गर्वको विषय बनेका छन् । उनका साथीहरू, अभिभावक र समाजका अग्रजहरू समेत उनको कार्यको खुलेर प्रशंसा गर्छन् र धेरैले अहिले सहयोगी हात बनेर अगाडी आएका छन् ।
उनको सोच, परिश्रम र समर्पण आजको पुस्ताका युवाहरूका लागि एक प्रेरणादायी दृष्टान्त बनेको छ । यस्तो लाग्छ, यदि देशभरि अमृतजस्ता युवाहरू सक्रिय भए, हाम्रो समाज र राष्ट्रको रूपान्तरण टाढा छैन ।
अन्य समाचारहरु
