एक दर्जन बैंकले बढाए खराब कर्जा, कुनकाे कति ?

काठमाडौं ।  एक दर्जन भन्दा बढी बैंकहरुले खराब कर्जा बढाएका छन् । 
बैंकहरुले सार्वजिक गरेको अघिल्लो आर्थिक वर्षको चौथो चौमासको वित्तीय विवरणअनुसार धेरै बैंकहरुको खराब कर्जा अनुपात (एनपीएल) बढेको हो । गत आर्थिक वर्ष २०८१/८२ मा खराब कर्जामा एभरेष्ट बैंक ०.३८ प्रतिशतमा सीमित रहँदा, हिमालयन बैंक ७.२८ सहित सबैभन्दा बढी रहेको देखिन्छ । एनआईसी, कुमारी, सिटिजन्स, नबिल र लक्ष्मी सनराइज बैंकमा पनि खराब कर्जाको दर तुलनात्मक रूपमा उच्च छ ।

एनआइसी एशिया बैंकले खराब कर्जा करिब दोब्बरले बढाएको छ । २०८०/८१ मा एनआईसीको खराब कर्जा अनुपात ३.४५ प्रतिशत रहेकोमा २०८१/८२ मा त्यस्तो कर्जाको अनुपात ६.२८ प्रतिशत पुगेको छ । यसले एनआइसी एसियाले गरिरहेको धेरै जसो कर्जा लगानी फसिरहेको देखाउछ । अर्को बैंक, ग्लोवल आइएमईले पनि समीक्षा अवधीमा एनपिएल बढाएको छ । अघिल्लो वर्षमा ४.१७ प्रतिशत एनपिल रहेको ग्लोबल आईएमई बैंकको त्यस्तो अनुपात २०८१/८२ मा ४.८७ प्रतिशत पुगेको छ ।

अर्को ठूलो बैंक प्रभु बैंकले पनि एनपीएल बढाएको छ । प्रभु बैंकले २०८१/८२ मा खराब कर्जा अनुपात ४.९६ प्रतिशत पुर्याएको छ । त्यसअघिको आर्थिक वर्षमा सो बैंकको एनपील ४.९४ प्रतिशत कायम रहेको थियो । अर्को, नेपाल एसबिआइ बैंकले पनि खराब कर्जा अनुपातलाई भारी रुपमा बढाएको छ । २०८०/८१ मा १.९६ प्रतिशत त्यस्तो अनुपात रहेकोमा २०८१/८२ मा ३.३५ प्रतिशत पुगेको छ ।

त्यस्तै, एनएमबी बैंकले पनि खराब कर्जा बढाएको छ । सो बैंकको २०८१/८२ मा एनपील ३.७२ प्रतिशत पुगेको छ । जुनकी त्यसअघिको वर्षमा एनएमबी बैंकको खराब कर्जा अनुपात ३.४ प्रतिशत रहेको थियो ।

त्यस्तै, कुमारी बैंकले पनि एनपीएल बढाएको छ । २०८१÷८२ मा खराब कर्जा ६.४२ प्रतिशत पु¥याएको कुमारी बैंकको त्यसअघिको वर्षमा ५.९५ प्रतिशत रहेको थियो ।
सिद्धार्थ बैंकको पनि खराब कर्जा पछिल्लो समय बढ्दै गएको देखिएको छ । २०८१/८२ मा उक्त बैंकल २.६२ प्रतिशत एनपीएल पु¥याएको छ । त्यसअघिको वर्षमा सिद्धार्थ बैंकको खराब कर्जा अनुपात २.१७ प्रतिशत रहेको थियो ।

अर्को हिमालन बैंकको पनि खराब कर्जा अनुपात बढेको छ । यो बैंकको खराब कर्जा अनुपात २०८०/८१ मा ४.९८ प्रतिशत रहेको थियो । २०८१/८२ मा अहिले त्यस्तो अनुपात यो बैंकले ७.२८ प्रतिशत पु¥याएको छ ।

सिटिजन्स बैंकले पनि खराब कर्जा अनुपात बढाएको छ । २०८०/८१ मा सिटिजन्सको त्यस्तो अनुपात ४.१ प्रतिशत रहेकोमा २०८१/८२ मा ४.९४ प्रतिशत पुगेको छ ।
नेपाल बैंकले समेत खराब कर्जालाई बढाइरहेको तथ्यांकले देखाउछ । उक्त बैंकको खराब कर्जा अनुपात २०८०/८१ मा ४.३३ प्रतिशत रहेकोमा २०८१/८२ मा बढेर ४.४७ प्रतिशत पुगेको छ । प्राइम, सानिमा बैंकहरुले पनि खराब कर्जा पछिल्लो समय बढाएका छन् । प्राइम बैंकको खराब कर्जा अनुपात २०८०/८१ मा ४.६५ प्रतिशत रहेकोमा २०८१/८२ मा बढेर ५.५६ प्रतिशत पुगेको छ ।

यस्तै नेपाल इन्भेष्टमेन्ट बैंकको खराब कर्जा पनि बढेको छ । उक्त बैंकको निष्क्रिय कर्जा ४.९१ प्रतिशतबाट बढेर ५.८५ प्रतिशत पुगेको छ ।
सानिमा बैंकले पनि खराब कर्जा अनुपात बढाएको छ । सानिमाको २०८०/८१ मा १.७२ प्रतिशत रहेकोमा २०८१/८२ मा बढेर ३.०१ प्रतिशत पुगेको छ । बैंक तथा वित्तीय संस्थाहरुले सार्वजनिक गरेको वित्तीय विवरणअनुसार सरकारी लगानी रहेको कृषि विकास बैंक, राष्ट्रिय वाणिज्य बैंक, नबिल, एभरेष्ट, स्टान्डर्ड चाटर्ड, लक्ष्मी सनराइज, माछापुच्छ«ेको खराब कर्जा अनुपात अघिल्लो आर्थिक वर्षको तुलनामा झिनो रुपमा घटाएका छन् ।