पौष ३ गते, २०८२ मा प्रकाशित
-गोपाल प्रसाद भट्टराई , अर्घाखाँची।
पौष–०३,अर्घाखाँची – अर्घाखाँचीको भूमिकास्थान नगरपालिकाले रुपन्देही जिल्लाभरका अस्पतालमा उपचार गर्दा लाग्ने रगत आफ्ना नागरिकलाई निःशुल्क उपलब्ध गराउने भएको छ ।
उपचारको क्रममा रगत आवश्यक पर्ने तर अस्पतालमा रगत उपलब्ध नहुने अवस्थामा नागरिकको स्वास्थ्य सुरक्षामा सहजता होस्, भनि पालिकाले यस्तो योजना ल्याएको हो । जसलाई प्रभावकारी व्यवस्थापन गर्न भूमिकास्थान नगरपालिका र नेपाल रेडक्रस सोसाइटी रुपन्देही शाखाबीच सम्झौता भएको छ ।
सम्झौतामा रुपन्देही रेडक्रसले भूमिकास्थानका आम नागरिकलाई आवश्कय रगत तथा रक्ततत्व निःशुल्क उपलब्ध गराउने र पालिकाले आवश्यक लागत रेडक्रसलाई
भुक्तानी गर्ने सहमती गरिएको भूमिकास्थानका स्वास्थ्यशाखा प्रमुख शुरेस प्रसाद गैरेले जानकारी दिनुभएको छ ।
भूमिकास्थानबासीलाई बिरामी पर्दा चाहिने रगतको अभावले ज्यान अप्ठ्यारोमा नपरोस् र उपचारमा सहज होस्,भन्ने हेतुले यो सम्झौता गरिएको नगरप्रमुख झविलाल थापाको भनाई छ । भूमिकास्थान नगर प्रमुख थापा र रुपन्देही रेडक्रसका सभापति रामचन्द्र उपाध्यायले बुधबार सम्झौतापत्रमा हस्ताक्षर गर्नुभएको छ ।
सम्झौता कार्यक्रमको साक्षीको रूपमा पालिकाको तर्फबाट स्वास्थ्य शाखा प्रमुख गैरे र रक्तसञ्चार सेवा समिति रुपन्देहीका संयोजक शुसिल गुरुङ रहनुभएको छ ।
सम्झौता अनुसार भूमिकास्थानका आम नागरिकले रेडक्रस रुपन्देही शाखा अन्तर्गत सञ्चालित रक्तसञ्चार सेवा केन्द्र (ब्लड बैंक) बाट निःशुल्क रगत तथा रक्ततत्व प्राप्त गर्न सक्नेछन् । यसरी रगत तथा रक्ततत्वको सेवा लिनको लागि भूमिकास्थानको बासिन्दा भएको प्रमाण खुल्ने कुनैपनि परिचयको कागजात पेश गर्नुपर्नेछ ।
आकस्मिक अवस्थामा कागजात तत्काल पेश गर्न नसकेमा पहिले सेवा शुल्क बुझाई २४ घण्टाभित्र कागजात पेश गरेमा उक्त रकम फिर्ता गरिने सहमती गरिएको छ ।
सम्झौता अनुसार वर्षमा दुई पटक रेडक्रसको प्राविधिक सहयोगमा रक्तदान कार्यक्रम आयोजना गरिने नगरप्रमुख थापाले बताउनुभएको छ ।
यो सम्झौताले नगरवासीको जीवन रक्षा गर्न महत्वपूर्ण भूमिका खेल्ने नगरप्रमुख थापाको विश्वास छ । यो सम्झौता अनुसार रक्तसेवा २०८३ साल असार मसान्तसम्म लागू हुनेछ ।
अन्य समाचारहरु
