पौष १५ गते, २०८२ मा प्रकाशित
गोपाल प्रसाद भट्टराई , अर्घाखाँची।
पौष–१५,अर्घाखाँची- अर्घाखाँचीको भूमिकास्थान नगरपालिकामा आठौं नगर स्तरिय राष्ट्रपति रनिङ शिल्ड प्रतियोगिता सुरु भएको छ । भूमिकास्थान–८, रातापोखरामा सोमबारदेखि प्रतियोगिता सुरु भएको हो ।
गत शुक्रबारदेखि गर्ने भनिएको यो प्रतियोगितामा सहभागी हुने जनजागृती मा.वि.धनचौरका विद्यार्थि बोकेको गाडि दुर्घटनामा परेपछि खेल राकिएको थियो ।
प्रतियोगिताको उद्घाटन गर्दै नगरप्रमुख झविलाल थापाले दुर्घटनामा ज्यान गुमाउने चालकलाई श्रदान्जली व्यक्त गर्दै परिवारजनमा समवेदना दिनुभएको छ । यस्तै घाइते शिक्षक र विद्यार्थिको शिघ्रस्वास्थ्यलाभको कामना पनि गर्नुभएको छ ।
कार्यक्रममा बोल्दै उहाँले मानिसको शारीरिक र मानसिक स्वास्थ्यका लागि खेलकुद अपरिहार्य रहेको बताउनुभएको छ । खेलविकासमा भूमिकास्थानले लगानी र गतिविधि निरन्तर गर्दै आएको स्मरण गर्दै नगरप्रमुख थापाले आगामी दिनमा पनि खेलक्षेत्रमा काम गर्ने वचन दिनुभएको छ ।
कार्यक्रममा उप–प्रमुख बालकृष्ण बन्जाडे, प्रमुख प्रशासकिय अधिकृत जग्दीशचन्द्र नेपाली, शिक्षा शाखा प्रमुख तुवलाल सापकोटा र नेपाल पत्रकार महासंघ अर्घाखाँचीका अध्यक्ष गणेश खनालले खेलकुदको माध्यमबाट शारिरिक स्फूर्ति बढाउनुका साथै चौतर्फी रुपमा क्षमता विकासमा सहयोगी सिद्ध रहने उल्लेख गर्नुभयो ।
प्रतियोगितामा भलिबल, कबड्डी, दौड, रिलेदौड, हाइजम्प, लङजम्प, त्रिपलजम्प, सटपूट, ज्यावलिङ थ्रो लगायतका खेल समावेश गरिएको छ । विजेता विद्यार्थि र स्कुललाई शिल्ड, मेडल र प्रमाणपत्रले सम्मान गरिने पालिकाले जनाएको छ ।
प्रतियोगितामा जनजागृती मा.वि.धनचौर बाहेक नगरभित्रका १२ वटा मा.वि.तहका विद्यार्थीले प्रतिस्पर्धा गर्ने भूमिकास्थान नगरपालिकाका कम्प्युटर अधिकृत शेषकान्त घिमिरे ओशनले जानकारी दिनुभएको छ । “स्वास्थ्यको लागि खेलकुद, राष्ट्रको लागि खेलकुद, अनुशासनको लागि खेलकुद, पहिचानको लागि खेलकुद” भन्ने मूल नाराका साथ प्रतियोगिता सञ्चालन गरिएको हो ।
खेल उद्घाटन कार्यक्रममा भूमिकास्थानका वडाध्यक्षहरू, कार्यपालिका सदस्यहरु, विभिन्न शाखाका कर्मचारी, विभिन्न विद्यालयका प्रधानाध्यापक, खेल शिक्षक, सञ्चारकर्मी लगायतको सहभागिता रहेको थियो ।
थप तस्बिर :
अन्य समाचारहरु
