पौष १६ गते, २०८२ मा प्रकाशित
फागुन २१ गते हुने निर्वाचनका लागि पत्रकार सम्मेलनमार्फत औपचारिक घोषणा, सुशासन र रोजगारी प्रमुख एजेन्डा
-केशब पन्थी , अर्घाखाँची डटकम।
अर्घाखाँची — राष्ट्रिय स्वतन्त्र पार्टी (रास्वपा) अर्घाखाँचीका जिल्ला सभापति हरि प्रसाद भुसालले आगामी फागुन २१ गते हुने प्रतिनिधि सभा सदस्य निर्वाचनका लागि आकांक्षी उम्मेदवारका रूपमा आफ्नो उम्मेदवारी औपचारिक रूपमा घोषणा गर्नुभएको छ।
सन्धिखर्कस्थित राष्ट्रिय स्वतन्त्र पार्टीको जिल्ला कार्यालयमा आयोजित पत्रकार सम्मेलनमार्फत सभापति भुसालले आफ्नो उम्मेदवारी घोषणा गर्नुभएको हो। अर्घाखाँचीमा राष्ट्रिय स्वतन्त्र पार्टीको संगठन विस्तार र स्थापना प्रक्रियामा नेतृत्वदायी भूमिका निर्वाह गर्नुभएका भुसाल पार्टीका संस्थापक सभापतिसमेत रहनुभएको छ। उहाँ यसअघि पनि अर्घाखाँचीबाट प्रतिनिधि सभा सदस्य पदका लागि निर्वाचन प्रतिस्पर्धामा उत्रिसक्नुभएको छ।
भुमिकास्थान नगरपालिका–३ मा जन्मिनुभएका भुसाल लामो समयदेखि सन्धिखर्क केन्द्रित रहेर व्यवसाय, राजनीति तथा सामाजिक सेवामा निरन्तर सक्रिय रहँदै आउनुभएको छ। स्थानीय स्तरदेखि जिल्लास्तरसम्म पार्टी संगठन सुदृढीकरण, सामाजिक अभियान तथा जनसम्पर्क कार्यक्रममार्फत उहाँले उल्लेखनीय भूमिका निर्वाह गर्दै आउनुभएको बताइएको छ।
पत्रकार सम्मेलनमा बोल्दै सभापति भुसालले अर्घाखाँची जिल्लाको समग्र विकास, सुशासनको सुनिश्चितता, रोजगारी सिर्जना, युवालाई जिल्लामै अवसर उपलब्ध गराउने, शिक्षा र स्वास्थ्य क्षेत्रमा सुधार जस्ता विषयलाई आफ्नो प्रमुख राजनीतिक एजेन्डा बनाउने स्पष्ट पार्नुभयो। उहाँले अर्घाखाँचीलाई विकासको मूल धारमा ल्याउन दीर्घकालीन योजना र पारदर्शी नेतृत्व आवश्यक रहेको धारणा व्यक्त गर्नुभयो।
भुसालले जिल्लामा रहेका सम्भावनायुक्त क्षेत्रहरू—कृषि, पर्यटन, साना तथा घरेलु उद्योग—लाई व्यवस्थित रूपमा विकास गर्न सके स्थानीय अर्थतन्त्र मजबुत बन्ने बताउनुभयो। साथै युवाहरू रोजगारीको खोजीमा जिल्ला बाहिर वा विदेश जानुपर्ने अवस्थालाई अन्त्य गर्न स्थानीय तहमा रोजगारी सिर्जना गर्ने नीति र कार्यक्रम अघि सार्ने प्रतिबद्धता जनाउनुभयो।
कार्यक्रममा राष्ट्रिय स्वतन्त्र पार्टी **लुम्बिनी प्रदेश समिति सदस्य तथा समानुपातिक उम्मेदवारका आकांक्षी दिनेश ‘विकल्प’**ले पनि पार्टीको राजनीतिक धारणा प्रस्तुत गर्नुभयो। उहाँले देशमा विद्यमान परम्परागत राजनीतिक अभ्यासभन्दा फरक, वैकल्पिक राजनीति, पारदर्शिता, उत्तरदायित्व र जनउत्तरदायी नेतृत्व समयको आवश्यकता भएको उल्लेख गर्नुभयो।
पत्रकार सम्मेलनमा जिल्लाका सक्रिय सञ्चारकर्मीहरूको उल्लेख्य उपस्थिति रहेको थियो। साथै राष्ट्रिय स्वतन्त्र पार्टीका जिल्ला, नगर तथा गाउँपालिका तहका पदाधिकारी, नेता तथा कार्यकर्ताहरूको सहभागिता समेत रहेको जनाइएको छ।
राष्ट्रिय स्वतन्त्र पार्टीले अर्घाखाँचीमा संगठन विस्तारसँगै जनस्तरमा आफ्नो राजनीतिक एजेन्डा पुर्याउने उद्देश्यले आगामी दिनमा थप जनसम्पर्क, छलफल तथा राजनीतिक कार्यक्रमहरू सञ्चालन गर्ने जनाएको छ।
थप तस्बिर :
अन्य समाचारहरु
