पौष १७ गते, २०८२ मा प्रकाशित
-केशब पन्थी ,अर्घाखाँची डटकम।
अर्घाखाँची – सन्धिखर्क नगरपालिका वडा नम्बर १ रतले निवासी नारायण प्रसाद भुसालको घरमा सामान्य रूपमा बत्ती बाल्दा ६० हजार रुपैयाँको असामान्य विद्युत बिल आएपछि स्थानीय समाजमा चासो उत्पन्न भएको छ।
पीडित पार्वता भुसालले बिल तिरेपछि नगरपालिकामा जानकारी गराउनुभयो। जानकारी पाउने बित्तिकै नगरप्रमुख कृष्णप्रसाद श्रेष्ठले नेपाल विद्युत वितरण केन्द्र अर्घाखाँची शाखाका प्रमुखसँग सम्पर्क गरी नगरपालिकामा विशेष छलफल गर्नुभयो। छलफलमा विद्युत कार्यालयका निति प्रमुख खिमराज आचार्य र पार्वता भुसाल दुवै उपस्थित हुनुहुन्थ्यो।
नगरप्रमुख श्रेष्ठले घटनालाई गम्भीर ठहर गर्दै भन्नुभयो,
“साधारण घरमा यति ठूलो बिल आउनु दुर्लभ र चिन्ताजनक विषय हो। यसबारे विद्युत कार्यालयले तुरुन्त छानबिन गर्नुपर्छ र भविष्यमा यस्ता समस्या दोहोरिन नदिन सचेत हुनुपर्छ।”
पीडित पार्वता भुसालले घरको सामान्य विद्युत प्रयोगमा यति ठूलो बिल आएको भन्दै आफ्नो अनुभव सार्वजनिक गर्दै, “यदि समयमै सबै निकायलाई जानकारी गराएको भए समस्या चाँडो समाधान हुने थियो,” भन्नुभयो।
नगरप्रमुख श्रेष्ठले नगरवासीलाई कुनै पनि विद्युत सम्बन्धी असामान्य समस्या देखा परे तुरुन्त नगरपालिकामा जानकारी गराउन आह्वान गर्नुभएको छ।
अन्य समाचारहरु
