“अर्घाखाँची महोत्सवको एघारौँ दिन: प्रकाश दुतराजको धमाकेदार प्रस्तुति, दर्शक र अतिथिहरू स्टेजमा नाच्दै” (तस्बिर सहित )

-केशब पन्थी ,अर्घाखाँची डटकम।

सन्धिखर्क, अर्घाखाँची – अर्घाखाँचीको सन्धिखर्कस्थित महोत्सव स्थलमा माघ ७ गते बुधबार आयोजित सातौँ अर्घाखाँची महोत्सवको एघारौँ दिन विशेष मनोरञ्जनात्मक र उल्लासपूर्ण बनेको छ।

चेम्बर अफ कमर्स अर्घाखाँचीको आयोजनामा सञ्चालन भइरहेको महोत्सवको यस दिनको मुख्य आकर्षण राष्ट्रियस्तरका चर्चित लोकदोहोरी गायक प्रकाश दुतराजको दमदार प्रस्तुति रह्यो, जसले उपस्थित दर्शकहरू र विशिष्ट पाहुनाहरूलाई समेत स्टेजमा उक्लिएर नाच्न बाध्य बनायो।

साँझपख सुरु भएको सांगीतिक कार्यक्रममा गायक दुतराजले आफ्नो लोकप्रिय लोकदोहोरी तथा आधुनिक गीत प्रस्तुत गर्दा महोत्सव स्थल पूर्णरूपमा उत्साहले भरिएको थियो। जिल्ला समन्वय समिति अर्घाखाँचीका प्रमुख जीवनारायण कोइराला, प्रमुख जिल्ला अधिकारी तोयनारायण सुवेदी, साथै अन्य विशिष्ट पाहुनाहरू उपस्थित थिए। गायक दुतराजको ऊर्जाशील प्रस्तुति देखेर उनीहरू समेत स्टेजमा नाच्दै रमाइलोको वातावरण सिर्जना गरे।

उपस्थित दर्शकहरूले आजको कार्यक्रम अत्यन्तै रमाइलो र अविस्मरणीय बनेको प्रतिक्रिया दिएका छन्। “लामो समयपछि यस्तो खुला, उल्लासपूर्ण र मनोरञ्जनात्मक कार्यक्रम अनुभव गर्न पाइयो,” मेला हेर्न आएका दर्शकहरुको भनाइ थियो ।

कार्यक्रममा प्रकाश दुतराजसँगै अन्य चर्चित लोकदोहोरी गायक–गायिकाहरूले पनि आफ्ना प्रस्तुति प्रस्तुत गरे। कार्यक्रमको सञ्चालन दिपु मगरले गर्नु भएको थियो, जसले आफ्नै रोचक शैली, दर्शकसँगको संवाद र समयअनुकूल प्रस्तुतीमार्फत कार्यक्रमलाई अझ आकर्षक बनाएका थिए।

महोत्सवको उद्देश्य स्थानीय उत्पादन प्रवर्द्धन, व्यापार व्यवसायको विकास, सांस्कृतिक संरक्षण र मनोरञ्जन प्रदान गर्नु रहेको आयोजकले जानकारी दिएका छन्। महोत्सव स्थलमा कृषि, घरेलु तथा साना उद्योगका स्टलहरू, खानाका परिकार, बालबालिकाका खेल तथा विभिन्न प्रदर्शनीले उपस्थित दर्शकको ध्यान तानेको थियो।

चेम्बर अफ कमर्स अर्घाखाँचीले भोलिको कार्यक्रम अझ विशेष हुने जानकारी दिएको छ। भोलि हुने कार्यक्रममा प्रस्तुती दिनको लागी प्रस्तुतीमा लोकप्रिय गायिका शान्तिश्री परियार लगायत अन्य चर्चित कलाकारहरूको सहभागिता रहनेछ। आयोजकका अनुसार भोलि अझ बढी दर्शकको सहभागिता रहने अपेक्षा गरिएको छ।

समग्रमा, सातौँ अर्घाखाँची महोत्सवको एघारौँ दिन सांगीतिक धमाका, दर्शक र आदरणीय विशिष्ट पाहुनाको सक्रिय सहभागिता, र सांस्कृतिक रौनकले यस कार्यक्रमलाई ऐतिहासिक, अविस्मरणीय र सम्झनलायक बनाएको छ।

थप तस्बिर :

#ArghakhanchiCom #PrakashDutaraj #LokDohoriMagic