फाल्गुन ९ गते, २०८२ मा प्रकाशित
काठमाडौं । प्रतिनिधि सभा सदस्य निर्वाचन, २०८२ को तयारीका क्रममा ७ वटा राजनीतिक दल र ८६७ जना उम्मेदवारले निर्वाचन प्रचारप्रसारका लागि बैंक खाता खोली सञ्चालनमा ल्याएका छन् ।
तीन हजार ४०६ जना प्रत्यक्षतर्फका उम्मेदवारमध्ये ८६७ जनाले मात्र बैंक खाता खोलेर आयोगमा जानकारी गराएका हुन् ।
निर्वाचन आयोगका अनुसार निर्वाचन खर्चमा पारदर्शिता कायम गर्ने, कानुनले तोकेको खर्च सीमाको पालना गराउने तथा आर्थिक कारोबारको प्रभावकारी निगरानी सुनिश्चित गर्ने उद्देश्यले ‘प्रतिनिधि सभा सदस्य निर्वाचन प्रचारप्रसार बैंक खाता (सञ्चालन तथा व्यवस्थापन) कार्यविधि, २०८२’ कार्यान्वयनमा ल्याइएको छ ।
उक्त कार्यविधिअनुसार निर्वाचनमा भाग लिन आयोगमा दर्ता भएका तथा समानुपातिक र पहिलो हुने निर्वाचित हुने निर्वाचन प्रणालीअन्तर्गत उम्मेदवारी दिएका सबै राजनीतिक दल, दलका उम्मेदवार र स्वतन्त्र उम्मेदवारले प्रचारप्रसारका क्रममा हुने सम्पूर्ण आम्दानी तथा खर्च तोकिएको बैंक खातामार्फत मात्र गर्नुपर्ने व्यवस्था गरिएको छ।
भूगोलअनुसार उम्मेदवारले २५ लाखदेखि ३३ लाखसम्म खर्च गर्न पाउने व्यवस्था गरिएको छ, उम्मेदवारको खाताबाट पैसा कता जान्छ भन्ने अनुगमन पनि यसपटक हुन्छ, आर्थिक अनुशासनका लागि यो व्यवस्था गरिएको आयोगले जनाएको छ ।
आयोगका अनुसार कार्यविधि कार्यान्वयनसँगै निर्वाचनसम्बन्धी आर्थिक कारोबारलाई व्यवस्थित र पारदर्शी बनाउने प्रयास गरिएको हो। यसले निर्वाचन प्रक्रियामा स्वच्छता र जवाफदेहिता प्रवर्द्धन गर्ने विश्वास गरिएको छ।
आयोगले बाँकी दल तथा उम्मेदवारलाई समेत कार्यविधिअनुसार अनिवार्य रूपमा बैंक खाता सञ्चालन गर्न आग्रह गरेको छ।
#निर्वाचन२०८२ #PoliticalNews #BankAccount #ElectionUpdate #NepalPolitics #समसामयिकसमाचार #राष्ट्रियसमाचार #मुख्यसमाचार #NepalNews #PoliticalTransparency #ElectionNepal #CandidateUpdate #FinanceNepal #ArghakhanchiCom #Arghakhanchidotcom #ArghakhanchiComHD
अन्य समाचारहरु
