हाम्रो कुटनीति ‘विकास कुटनीति’ हुनेछ, लगानीकर्ताले नेताको आश्रय लिनुपर्दैनः रवि लामिछाने

राष्ट्रिय स्वतन्त्र पार्टी (रास्वपा) का सभापति रवि लामिछानेले आफ्नो पार्टीको नेतृत्वमा बन्ने सरकारले असंलग्न परराष्ट्र नीतिलाई कडाइका साथ कार्यान्वयन गर्ने बताउनुभएको छ । अन्तर्राष्ट्रिय समुदायलाई आश्वस्त पार्दै उहाँले रास्वपाको कुटनीति अब ‘डेभलपमेन्ट डिप्लोमेसी’ (विकास कूटनीति) मा केन्द्रित हुने प्रष्ट पार्नुभएको हो । चितवनमा आयोजित धन्यवाद सभामा बोल्दै लामिछानेले सन्तुलित र एक अर्काप्रति पारस्परिक सम्मानपूर्वक परराष्ट्र नीतिमा अडिग रहने बताउनु भयो ।

लामिछानेले देशको निजी क्षेत्र र उद्योगी व्यवसायीहरुलाई अब राजनीतिक दल र नेताहरुको चाकडी गर्नुपर्ने दिनको अन्त्य भएको दाबी गर्नुभयो । स्वदेशमा लगानी गर्ने वातावरण बनाउन रास्वपाले विशेष नीति ल्याउने र त्यसले लगानीकर्ताको पूर्ण रक्षा गर्ने उहाँले दाबी गर्नुभयो ।

उहाँले भन्नुभयो, ‘म अन्तर्राष्ट्रिय समुदायलाई निर्धक्क हुन अनुरोध गर्न चाहन्छु कि रास्वपाले नेतृत्व गर्दा हामी सन्तुलित र एक अर्काप्रति पारस्परिक सम्मानपूर्वक परराष्ट्र नीतिमा अडिग रहनेछौँ । सँगै विकासमा सहकार्य गरेर हाम्रो सम्बन्धको उचाइ नयाँ ठाउँमा पुग्नेछ । म निजी क्षेत्रलाई अनुरोध गर्न चाहन्छु कि अब तपाईंले राजनीतिक दल र नेताको आश्रय लिनुपर्ने दिन गए। रास्वपाको नीतिले तपाईंको रक्षा र सुरक्षा गर्नेछ । स्वदेशमा लगानी गर्ने वातावरण बनाउन र लगानी सुनिश्चित गर्नका निमित्त रास्वपाले निरन्तर काम गर्नेछ ।’

विभिन्न पेशा व्यवसायमा आवद्ध नागरिकहरुलाई नआत्तिन आग्रह गर्दै उहाँले पार्टीको वाचा पत्रअनुसार नै जनताको हक हितको रक्षाका लागि काम गर्ने प्रतिवद्धता व्यक्त गर्नुभयो ।