बगदादबाट अमेरिकी पत्रकार किटल्सनको अपहरण

काठमाडौँ । इराकको राजधानी बगदादबाट अमेरिकी स्वतन्त्र पत्रकार शैली किटल्सनको अपहरण गरिएको घटना सार्वजनिक भएको छ । मंगलबार अज्ञात समूहले अल सादुन सडक नजिकैबाट किटल्सनलाई जबरजस्ती गाडीमा राखेर लगेका हुन् ।

घटनासँग सम्बन्धित एक भिडियो सामाजिक सञ्जालमा फैलिएको छ, जसमा हतियारधारी व्यक्तिहरूले पत्रकार किटल्सनलाई गाडीबाट तानेर अपहरण गर्दै लगेको देखिन्छ ।

इराकको गृह मन्त्रालयले घटनाको पुष्टि गर्दै पत्रकार किटल्सन अपहरणमा परेको जनाएको छ । मन्त्रालयका अनुसार सुरक्षाकर्मीलाई तत्काल परिचालन गरिएको जनाएको छ ।

अपहरणमा परेकी पत्रकार किटल्सन पछिल्लो समय एक अन्तर्राष्ट्रिय समाचार वेबसाइटका लागि मध्यपूर्व केन्द्रित रिपोर्टिङ गर्दै आएकी थिइन् । उनी युद्धग्रस्त क्षेत्रबाट समाचार संकलन गर्ने पत्रकारका रूपमा परिचित छन् ।

गृह मन्त्रालयका अनुसार प्राप्त गोप्य सूचनाको आधारमा सुरक्षाकर्मीले अपहरणकारीको खोजी गरेका थिए । यस क्रममा अपहरणमा प्रयोग गरिएको एउटा गाडी दुर्घटनामा परेपछि एक जना संलग्नलाई पक्राउ गरिएको र केही सवारीसाधन नियन्त्रणमा लिइएको छ ।

तर पत्रकारलाई लगिएको अर्को गाडी भने घटनास्थलबाट फरार भई बगदादको दक्षिणतर्फ गएको जनाइएको छ ।

यस घटनामा इरान समर्थित सशस्त्र समूहको संलग्नता हुनसक्ने आशंका गरिएको छ । तर यसबारे आधिकारिक पुष्टि भने भइसकेको छैन ।

पत्रकार किटल्सनले यसअघि मध्यपूर्व, विशेष गरी इराक र सिरियाको युद्धपछिको अवस्थाबारे विस्तृत रिपोर्टिङ गर्दै आएकी थिइन् । उनको रिपोर्टिङमा स्थानीय अवस्था, द्वन्द्वको प्रभाव र मानवीय संकटका विषय समेटिने गरेका थिए ।

यसैबीच, इराकको कमजोर सुरक्षा अवस्थालाई ध्यानमा राख्दै अमेरिकाले आफ्ना नागरिकलाई तत्काल देश छोड्न आग्रह गरेको छ । अमेरिकी दूतावासले हाल इराकमा बसोबास गर्नु जोखिमपूर्ण रहेको चेतावनी दिएको छ ।