प्रजातान्त्रिक गणतन्त्र कङ्गोद्वारा एमपक्स प्रकोप जनस्वास्थ्य आपतकालको रूपमा अन्त्य भएको घोषणा

स्वास्थ्य अधिकारीहरूकाअनुसार वर्षौंको प्रतिकार्य प्रयासपछि प्रजातान्त्रिक गणतन्त्र कङ्गो (डीआरसी) को सरकारले बिहीवार एमपक्स प्रकोप राष्ट्रिय चासोको जनस्वास्थ्य आपतकालका रूपमा अन्त्य भएको घोषणा गरेको छ । सरकारी अधिकारी, स्वास्थ्य विज्ञ र अन्तर्राष्ट्रिय साझेदारहरूको उपस्थितिमा आयोजित एक आधिकारिक समारोहमा यो घोषणा गरिएको हो ।

स्वास्थ्य मन्त्री रोजर काम्बाले महामारीको अन्त्य इबोला लगायतका विगतका स्वास्थ्य संकटहरूबाट सिकिएका पाठहरू र सचेत निर्णयहरूको परिणाम भएको बताउनु भयो । उहाँले देशले एमपक्स, हैजा र इबोला सहित धेरै महामारीहरूको एकैसाथ सामना गर्नुपरेको उल्लेख गर्नुभयो । उहाँले भाइरस पुनः बल्झिन नदिन निरन्तर निगरानी र पूर्वतयारी आवश्यक रहेकोमा जोड दिनुभयो ।

नेशनल इन्स्टिच्युट फर बायोमेडिकल रिसर्चकाअनुसार सन् २०२४ को पहिलो हप्तादेखि २०२६ को दोस्रो हप्ताको बीचमा ८० हजार भन्दा बढी नमुना परीक्षण गरिएको थियो । जसमा प्रयोगशालाद्वारा प्रमाणित ३४ हजार भन्दा बढी संक्रमित फेला परेका थिए भने २ हजार २ सय भन्दा बढीको मृत्यु भएको थियो ।

डीआरसीले सन् २०२२ को डिसेम्बरमा एमपक्स प्रकोपको घोषणा गरेको थियो । विश्व स्वास्थ्य संगठनले सन् २०२४ अगस्टमा एमपक्सलाई अन्तर्राष्ट्रिय चासोको जनस्वास्थ्य आपतकाल घोषणा गरेको थियो भने सन् २०२५ सेप्टेम्बरमा अफ्रिकाका लागि सो दर्जा हटाएको थियो ।

पहिले मङ्कीपक्स भनिने एमपक्स सन् १९५८ मा पहिलो पटक प्रयोगशालाका बाँदरहरूमा फेला परेको थियो । यो एक दुर्लभ भाइरल रोग हो जुन सामान्यतया शरीरको तरल पदार्थ, श्वासप्रश्वासका थोपाहरू र संक्रमित वस्तुहरूमार्फत सर्ने गर्दछ । यसको संक्रमणले प्रायः ज्वरो आउने, शरीरमा दागहरू देखिने र लिम्फ नोड्सहरू सुन्निने जस्ता लक्षणहरू निम्त्याउँछ ।

– एजेन्सी

#Congo #Mpox #Health #GlobalHealth #arghakhanchicom #arghakhanchidotcom #arghakhanchicomHD