चैत्र २४ गते, २०८२ मा प्रकाशित
सत्तारुढ राष्ट्रिय स्वतन्त्र पार्टीका सांसद सांसद ओजश्वी शेरचनले सरकारले स्वास्थ्य विमा कार्यक्रमको तत्काल नीतिगत सुधार गर्न आवश्यक रहेको बताउनुभएको छ ।
सो कार्यक्रम बजेटको अभावमा अघि बढ्नसक्ने अवस्थामा नरहेको चर्चा भइरहेको बेला सांसद शेरचनले सो आवश्यकता औँल्याउनुभएको हो । मंगलवार प्रतिनिधि सभा बैठकमा बोल्दै उहाँले सो समस्या समाधानका लागि स्वास्थ्य मन्त्रालय र अर्थ मन्त्रालयबीच बलियो समन्वय हुनुपर्नेमा पनि जोड दिनुभयो । सांसद शेरचनले स्वास्थ्य विमा कार्यक्रम आफैँ आर्थिक दवावमा पर्दा त्यसबाट सेवाग्राहीहरु मर्कामा पर्ने भएकाले सरकारले सो समस्या समाधानमा ढिलाई गर्न नहुने पनि स्पष्ट पार्नुभयो ।
उहाँले भन्नुभयो,‘स्वास्थ्य विमा ऐन २०७४ ले नागरिकलाई गुणस्तरीय स्वास्थ्य सेवा सुनिश्चित गर्दै उपचारको क्रममा हुने आर्थिक जोखिम कम गर्न महत्वपूर्ण उद्देश्य राखेको छ । तर विमा बोर्ड स्वयमले विमा भुक्तानी नपाएकाले यो कार्यक्रम स्वयम आर्थिक दवावमा रहेको छ । वीर अस्पतालमा ५१ करोड, टिचिङ अस्पतालमा ४० करोड र अन्य अस्पतालहरु गरी १६ अर्ब भन्दा माथि रकम भुक्तानी बाँकि छ । यसले स्वास्थ्य संस्थालाई सेवा निरन्तरता दिन कठिनाई भईरहेको छ । यस अवस्थालाई तुरुन्त सम्बोधन गर्न स्वास्थ्य बीमा बोर्ड, स्वास्थ्य मन्त्रालय र अर्थ मन्त्रायका बीच प्रभावकारी सम्बोधन आवश्यक छ । साथै विमा कार्यक्रमलाई दीर्घकालीन रुपमा टिकाउनका लागि नीतिगत सुधार जस्तै सबै विमा योजनाहरु एकीकृत गरी जोखिम पुल विस्तार गर्न प्रोग्रेसिव टयाक्स इन हेल्थ इन्स्योरेन्स गर्न आवश्यक छ ।’
सांसद शेरचनले सो समस्या समाधानका लागि सरकारले हेल्थ सम्बन्धि इन्स्योरेन्स गर्ने कार्यलाई पनि अघि बढाउनुपर्ने बताउनु भयो ।
अन्य समाचारहरु
