अरबाज खानको फिल्म ‘राजदार’ मा मनिषा कोइराला अनुबन्ध

काठमाडौँ । नेपाली मूलकी चर्चित अभिनेत्री मनिषा कोइराला नयाँ चलचित्र ‘राजदार’ मा अनुबन्धित भएकी छन् । यो चलचित्र अरबाज खानले निर्माण गर्न लागेका हुन् ।

मनिषाले यसअघि हीरामण्डी सिरिजमार्फत ओटिटी क्षेत्रमा डेब्यु गरेकी थिइन् । उक्त श्रृंखलामा उनको अभिनय निकै प्रशंसित भएको थियो । त्यसपछि उनलाई धेरै प्रस्ताव आए पनि उनले सोचेर मात्र भूमिका छनोट गर्ने निर्णय लिएकी थिइन् ।

रिपोर्ट अनुसार ‘राजदार’ को कथा र भूमिकाले मनिषालाई आकर्षित गरेपछि उनले यो चलचित्र स्वीकार गरेकी हुन् । यसअघि अर्को एक परियोजनामा छलफल भए पनि त्यो अघि बढ्न सकेको थिएन ।

यो चलचित्रको छायांकन यस वर्षको सुरुआतदेखि सुरु भइसकेको छ । मध्यप्रदेशको भोपालमा करिब २५ दिन छायांकन गरिएको थियो भने मुम्बईमा थप १० दिनको छायांकन सम्पन्न भएको छ ।

चलचित्रमा भुवन अरोरा पनि मुख्य भूमिकामा देखिनेछन् । निर्माण कम्पनी अरबाज खान प्रोडक्सन अन्तर्गत यो सातौँ चलचित्रका रूपमा तयार हुँदैछ ।

यसअघि पनि मनिषा र अरबाज एउटै पर्दामा देखिइसकेका छन् । उनीहरू सन् २००५ मा बनेको ताजमहल: एन इटर्नल लभ स्टोरी मा सँगै अभिनय गरेका थिए । अहिले ‘राजदार’ मार्फत उनीहरूको पुनः सहकार्य हुन लागेको हो ।