एक अर्ब डलर र देशकै सुन्दर महिला दिन युगान्डाका सेनाप्रमुखको टर्कीसँग माग !

काठमाडौँ । युगान्डाका सेनाप्रमुख तथा राष्ट्रपतिका छोरा मुहोजी कानेरुगाबाले टर्कीसँग सम्बन्धित विवादास्पद अभिव्यक्ति दिएपछि अन्तर्राष्ट्रिय स्तरमा चर्चा चुलिएको छ । उनले टर्कीबाट एक अर्ब डलर बराबर रकम र ‘देशकै सबैभन्दा सुन्दर महिला’लाई पत्नी बनाउने माग सार्वजनिक रूपमा गरेका छन् ।

सामाजिक सञ्जालमार्फत उनले माग पूरा नभए ३० दिनभित्र कूटनीतिक सम्बन्ध तोड्ने चेतावनी दिएका छन् । साथै टर्कीको दूतावास बन्द गर्ने र टर्किस एयरलाइन्समाथि प्रतिबन्ध लगाउन सकिने संकेतसमेत दिएका छन् । उनले युगान्डावासीलाई टर्की भ्रमण नगर्न पनि आग्रह गरेका छन् ।

कानेरुगाबाले सोमालियामा सञ्चालन भएको शान्ति मिसनको सन्दर्भ दिँदै टर्कीले त्यहाँ पूर्वाधार, बन्दरगाह र विमानस्थल परियोजनाबाट फाइदा लिएको आरोप लगाएका छन् । उनका अनुसार आतंकवादी समूहविरुद्ध लड्ने जिम्मेवारी भने युगान्डाले बहन गरेकाले सोही आधारमा आर्थिक क्षतिपूर्ति मागिएको हो ।

उनका यस्ता अभिव्यक्तिहरू पहिलो पटक भने होइनन् । यसअघि पनि उनले विभिन्न विवादास्पद टिप्पणी गर्दै आएका छन् । विपक्षी नेता बोबी वाइनविरुद्ध कठोर धम्की दिएको विषयमा आलोचना भएपछि पछि उनले माफी मागेका थिए ।

केही समयअघि आफ्नो सामाजिक सञ्जाल खाता हटाएका उनले पुनः ‘म फर्किएँ’ भन्दै सक्रियता बढाएका छन् । फर्किएपछि उनले सुरक्षा निकायलाई सैन्य पोशाक जस्तो देखिने व्यक्तिलाई तत्काल पक्राउ गर्न निर्देशन दिएका थिए । साथै एक अमेरिकी कूटनीतिज्ञले आफूलाई सलाम नगरे पक्राउ गर्ने धम्कीसमेत दिएका थिए ।

५० वर्षीय कानेरुगाबालाई वर्तमान राष्ट्रपति योवेरी मुसेवेनीका सम्भावित उत्तराधिकारीका रूपमा हेरिन्छ । यद्यपि राष्ट्रपति मुसेवेनीले यसलाई अस्वीकार गर्दै आएका छन् । तर राजनीतिक विश्लेषकहरूले उनी क्रमशः सत्ता राजनीतिमा सक्रिय बन्दै गएको टिप्पणी गरेका छन् ।

सन् १९८६ देखि सत्तामा रहेका मुसेवेनीपछि नेतृत्व सन्तानमा सर्ने संकेत देखिएको भन्दै देशभित्र पनि बहस बढ्दै गएको छ ।

यसअघि सन् २०२२ मा उनले इटालीकी प्रधानमन्त्री जर्जिया मेलोनीसँग विवाह प्रस्ताव राख्दै १०० गाई दिने प्रस्ताव गरेका थिए । प्रस्ताव अस्वीकार भए रोममाथि कब्जा गर्ने चेतावनी दिएपछि उक्त अभिव्यक्ति व्यापक विवादमा परेको थियो ।

त्यस्तै, उनले केन्याको राजधानी नैरोबी दुई साताभित्र कब्जा गर्न सकिने दाबी गरेपछि पनि आलोचना खेप्नुपरेको थियो । त्यसपछि उनलाई अस्थायी रूपमा पदबाट हटाइएको थियो र सरकारलाई माफी माग्नुपरेको थियो ।

यसअघि उनले रुस-युक्रेन युद्धमा रुसको समर्थन गर्दै अभिव्यक्ति दिएका थिए । मस्कोमाथि खतरा आए युगान्डाले सेना पठाउनेसम्मको टिप्पणी गरेपछि अन्तर्राष्ट्रिय रूपमा थप आलोचना भएको थियो ।