बैशाख १२ गते, २०८३ मा प्रकाशित
टेकराज भुसाल, भूमिकास्थान।
अर्घाखाँची । जिल्लाको भूमिकास्थान नगरपालिका वडा नं. १ र २ ढाकावाङ्गमा कार्यक्षेत्र रहेको प्रगति कृषि सहकारी संस्थाले सहकारीमा आवद्ध कृषकहरूलाई मौरी घार तथा सम्बन्धित सामग्री वितरण गरेको छ।
शनिबार आयोजित एक कार्यक्रमबीच भूमिकास्थान नगरपालिका उपप्रमुख बालाकृष्ण बन्जाडे, भूमिकास्थान -२ का वडाध्यक्ष बुद्धिबहादुर थापा, सहकारीका अध्यक्ष भुवानन्द भुसाल तथा नगरपालिकाको कृषि विकास शाखा (कृषि प्राविधिक) युवराज आचार्यले संयुक्त रूपमा कृषकहरूलाई मौरी हस्तान्तरण गर्नुभएको हो।
माैरी पकेट निरन्तर कार्यक्रम अन्तर्गत भूमिकास्थान नगरपालिकाको २ लाख ९९ हजार ३ सय ६० रुपैयाँ अनुदान तथा सहकारीको २ लाख ८९ हजार ३ सय ६० रुपैयाँ लगानी गरी कुल ५ लाख ८८ हजार ७ सय २० रुपैयाँ बराबरका सामग्री वितरण गरिएको छ। यसमा ४ फ्रेम सहितका ४७ गोला रानुसहितका मौरी घार, सुपर सहितका १५ थान मौरी घार, ५० थान रानु ढोका, १०० थान मह प्याकिङ बट्टा लगायतका अन्य आवश्यक सामग्री समावेश रहेका छन्।
मौरी वितरण कार्यक्रममा बोल्दै उपप्रमुख बालाकृष्ण बन्जाडेले ढाकावाङ्ग क्षेत्रलाई मौरी पालनको पकेट क्षेत्रका रूपमा विकास गर्दै यहाँ मह उत्पादनलाई बढावा दिनुपर्नेमा जोड दिनुभयो। उहाँले यस कार्यक्रमले स्थानीय कृषकहरूको आयआर्जनमा टेवा पुग्ने विश्वास व्यक्त गर्नुभयो।
त्यस्तै, सहकारीका अध्यक्ष भुवानन्द भुसालले मौरी पकेट कार्यक्रमलाई निरन्तरता दिँदै गत वर्षदेखि नै कृषकहरूलाई मौरी वितरण गर्दै आएको जानकारी दिनुभयो। उहाँले आगामी दिनमा समेत यस्ता कार्यक्रमलाई थप विस्तार गरिने बताउनुभयो।
नगरस्तरीय युवा सञ्जाल भूमिकास्थानका संयोजक टेकराज भुसालको सहजीकरण तथा सहकारीका उपाध्यक्ष खुविराम खनालको स्वागत मन्तव्यमा सम्पन्न कार्यक्रममा पाल्पाको तानसेन–७ बगनासकालीस्थित वंश गोपाल मौरी पालन फर्मका सञ्चालक पशुपति न्यौपानेले मौरी पालन सम्बन्धी विभिन्न प्राविधिक प्रशिक्षण तथा मौरीको हेरचाहबारे जानकारी दिनुभएको थियो।
यस कार्यक्रमले ढाकावाङ्ग क्षेत्रलाई मौरी उत्पादनको केन्द्रका रूपमा विकास गर्ने अपेक्षा गरिएको छ।
अन्य समाचारहरु
