बैशाख १८ गते, २०८३ मा प्रकाशित
काठमाडौँ । मेरिलिबोन क्रिकेट क्लब (एमसीसी) ले जारी आइपिएल अन्तर्गतको खेलमा कोलकाता नाइट राइडर्स र लखनउ सुपर जायन्ट्सबीच भएको खेलमा अङ्कृष रघुवंशीलाई ‘फिल्ड अवरोध’का आधारमा आउट दिने निर्णयलाई सही ठहर गरेको छ ।
अप्रिल २६ मा सम्पन्न खेलमा रघुवंशी पाँचौँ ओभरको अन्त्यतिर रन लिन प्रयास गर्दा यो घटना भएको थियो । उनले बल प्रहार गरेपछि रन लिन दौडिएका थिए तर सहखेलाडी क्यामरुन ग्रीनले फर्किन संकेत दिएपछि उनी पिचको बीच हुँदै दिशा परिवर्तन गर्दै फर्किएका थिए । सोही क्रममा फिल्डिङ टोलीले फ्याँकेको बल उनलाई लागेपछि अपिल गरिएको थियो ।
त्यसपछि तेस्रो अम्पायर रोहन पण्डितले अन्तर्राष्ट्रिय क्रिकेट परिषद्को नियम ३७ अनुसार ‘फिल्ड अवरोध’ ठहर गर्दै उनलाई आउट दिएका थिए । उनी इन्डियन प्रिमियर लिगमा यसरी आउट हुने चौथो खेलाडी बनेका छन् ।
मेरिलिबोन क्रिकेट क्लबले स्पष्टीकरण दिँदै ब्याट्सम्यानले जानाजानी फिल्डिङ टोलीलाई अवरोध गर्ने गरी व्यवहार गरेमा यस्तो निर्णय हुने बताएको छ । पिचको बीचबाट दौडेर दिशा परिवर्तन गर्नु सामान्य मार्ग नभएकाले यसलाई जानाजानी गरिएको कार्यका रूपमा व्याख्या गरिएको छ ।
क्लबका अनुसार रघुवंशीले अफ साइडबाट लेग साइडतर्फ सर्दै बल र विकेटबीच आफूलाई राखेका कारण यो स्पष्ट रूपमा अवरोध भएको हो । यदि उनी सामान्य मार्गमै दौडिएका भए बल नलाग्ने र यस्तो अवस्था नआउने उल्लेख गरिएको छ ।
यो निर्णयपछि कोलकाता टोली असन्तुष्ट देखिएको थियो । प्रशिक्षक अभिषेक नायर अम्पायरसँग छलफल गर्दै देखिएका थिए भने रघुवंशी पनि आउट भएपछि असन्तुष्टि जनाउँदै मैदान बाहिरिएका थिए ।
उक्त घटनापछि आचारसंहिता उल्लंघन गरेको भन्दै रघुवंशीलाई खेल शुल्कको २० प्रतिशत जरिवाना र एक डिमेरिट अंक पनि दिइएको छ । खेल अन्ततः सुपर ओभरमा पुगेको थियो, जहाँ कोलकाताले जित हात पारेको थियो ।
अन्य समाचारहरु
