अर्घाखाँची: सुपादेउराली दर्शन गरेर फर्किंदै गरेको बस पाणिनीमा दुर्घटना हुँदा ४ जनाको मृत्यु, २७ घाइते (पुरा बिबरण सहित )

सुपादेउराली दर्शन गरेर फर्किंदै गरेको बस पाणिनीमा दुर्घटना हुँदा ४ जनाको मृत्यु, २७ घाइते

अर्घाखाँची — अर्घाखाँचीको पाणिनी गाउँपालिका–८ दुर्गाफाँट मा सुपादेउराली मन्दिर दर्शन गरेर पर्वत फर्किंदै गरेको यात्रुबाहक बस दुर्घटना हुँदा ४ जनाको मृत्यु भएको छ भने २७ जना घाइते भएका छन्।

मंगलबार दिउँसो करिब १ बजे सुपादेउरालीबाट पर्वततर्फ जाँदै गरेको ध १ ख ५०४ नम्बरको बस पाणिनी गाउँपालिका–८ को कोलडाँडा–दुर्गाफाँट भित्री सडकखण्डमा अनियन्त्रित भई सडकबाट करिब १०० मिटर तल खस्न पुगेको प्रहरीले जनाएको छ।

बसमा पर्वत जिल्लाको मोदी गाउँपालिका पातिचौरका तीर्थयात्रीहरू सवार रहेका थिए। बसमा चालक दलसहित करिब ३० जना सवार रहेको प्रारम्भिक जानकारी प्राप्त भएको छ। दुर्घटनापछि जिल्ला प्रहरी कार्यालय अर्घाखाँची र प्रहरी चौकी पालीबाट ठूलो संख्यामा प्रहरी टोली परिचालन गरी उद्धार कार्य गरिएको थियो।

दुर्घटनामा चालक पर्वत मोदी गाउँपालिका–५ निवासी ४५ वर्षीय रमेश जिसीको मृत्यु भएको छ। त्यस्तै पोखरा महानगरपालिका–१९ निवासी ७८ वर्षीया राममाया बस्नेत, पर्वत मोदी गाउँपालिका–५ निवासी ५० वर्षीया बिन्दु कुँवर तथा सोही स्थानकी ५० वर्षीया कौशिला रेग्मीको पनि मृत्यु भएको प्रहरीले जनाएको छ।

घाइतेमध्ये केहीको जिल्ला अस्पताल सन्धिखर्कमा उपचार गरिएको थियो भने अवस्था गम्भीर रहेका घाइतेहरूलाई भैरहवा मेडिकल कलेज, लुम्बिनी मेडिकल कलेज प्रभास तथा पाल्पास्थित युनाइटेड मिसन अस्पतालमा रिफर गरिएको छ। प्रहरीका अनुसार घाइतेमध्ये ४ जनाको अवस्था गम्भीर, १९ जनाको अवस्था मध्यम र ४ जनाको अवस्था सामान्य रहेको छ। दुर्घटनामा १४ पुरुष र १७ महिला घाइते भएका छन्।

घटनापछि स्थानीयवासी, प्रहरी र सुरक्षाकर्मीको सक्रियतामा उद्धार कार्य गरिएको थियो। दुर्घटनाको कारणबारे प्रहरीले थप अनुसन्धान गरिरहेको जनाएको छ।

बस सुपादेउराली मन्दिर दर्शन गरेर पर्वत फर्किने क्रममा दुर्घटनामा परेको बताइएको छ। दुर्घटनाले अर्घाखाँची–पाल्पा सडक क्षेत्रमा केही समय तनावपूर्ण अवस्था सिर्जना भएको थियो।

दुर्घटनाको समग्र विवरण:

पाणिनी बस दुर्घटना अपडेट : कुन घाइतेको कहाँ उपचार भइरहेको छ ?

 मृतक : ४ जना

 घाइते : २७ जना

सिरियस : ४ जना

मध्यम : १९ जना

सामान्य : ४ जना