साइबर ब्यूरोको आग्रह- विश्वकप हेर्ने भन्दै अनलाइनमा ठगिबाट बच्नुहोला !

काठमाडौं । साइबर ब्यूरोले सामाजिक सञ्जालमार्फत भइरहेको नयाँ प्रकारको अनलाइन ठगीबारे सर्वसाधारणलाई सतर्क रहन आग्रह गरेको छ ।

ब्यूरोका अनुसार सामाजिक सञ्जालमा प्रायोजित विज्ञापनमार्फत ‘प्रत्यक्ष विश्वकप हेर्नुहोस्’ भन्ने प्रलोभन देखाई एपीके ढाँचाको अनुप्रयोग डाउनलोड गराउन खोज्ने प्रवृत्ति बढ्दो अवस्थामा देखिएको छ ।

यस्ता अनुप्रयोग डाउनलोड गराएपछि मोबाइलमा रहेका व्यक्तिगत विवरण, बैंकसम्बन्धी सूचना तथा अन्य संवेदनशील जानकारी चोरी हुने जोखिम रहने साइबर ब्यूरोले जनाएको छ ।

ब्यूरोले विशेषगरी अपरिचित लिंक तथा शंकास्पद विज्ञापनमा क्लिक नगर्न र प्ले स्टोर वा अन्य कुनै माध्यमबाट अनुप्रयोग स्थापना गर्दा अत्यन्त सावधानी अपनाउन अनुरोध गरेको छ ।

साइबर अपराधबाट बच्न आधिकारिक माध्यमबाट मात्र अनुप्रयोग डाउनलोड गर्न र कुनै पनि आकर्षक विज्ञापनको भरमा अज्ञात फाइल मोबाइलमा नराख्न ब्यूरोले सुझाव दिएको छ।