आषाढ़ ६ गते, २०८३ मा प्रकाशित
काठमाडौँ । इन्डियन प्रिमियर लिग (आईपिएल) २०२७ अघि दिल्ली क्यापिटल्स र लखनउ सुपर जायन्ट्सबीच ठूलो खेलाडी आदानप्रदान हुने सम्भावना देखिएको छ ।
रिपोर्ट अनुसार विकेटकिपर ब्याटर ऋषभ पन्तको दिल्लीमा पुनरागमन लगभग निश्चित भएको छ । यसका लागि उनी आफ्नो २७ करोड रुपैयाँ पारिश्रमिकबाट करिब १२ करोड रुपैयाँ कटौती गर्न समेत तयार भएका छन्।
यससँगै स्पिनर कुलदीप यादव लखनउ सुपर जायन्ट्समा आबद्ध हुने चर्चा छ । साथै, पूर्व भारतीय अलराउन्डर युवराज सिंह पनि पहिलो पटक आईपिएलमा प्रशिक्षक समूहको भूमिकामा देखिन सक्ने सम्भावना रहेको छ ।
दिल्ली क्यापिटल्स र लखनउ सुपर जायन्ट्सले खेलाडी आदानप्रदानको प्रस्ताव भारतीय क्रिकेट नियन्त्रण बोर्डसमक्ष पठाइसकेको बताइएको छ । बोर्डबाट स्वीकृति प्राप्त भएमा पन्त दिल्ली फर्किनेछन् भने कुलदीप लखनउमा आबद्ध हुनेछन् ।
लखनउले २०२५ को मेगा अक्सनमा पन्तलाई कीर्तिमानी २७ करोड भारुमा अनुबन्ध गरेको थियो, जुन आईपिएल इतिहासकै सबैभन्दा ठूलो बोली थियो । यही ठूलो पारिश्रमिक नै उनको स्थानान्तरणको मुख्य बाधा बनेको थियो, किनभने कुनै पनि टोलीका लागि यति ठूलो रकम तिरेर खेलाडी अनुबन्ध गर्न सहज मानिएको थिएन ।
तर, पन्तले आफैंले यो स्थानान्तरण सम्भव बनाउन आफ्नो पारिश्रमिक घटाउन सहमति दिएको बताइएको छ । अब उनले करिब १५ करोड मात्र प्राप्त गर्ने सम्भावना छ । अर्थात् उनले करिब १२ करोड कटौती स्वीकार गरेका छन् । यसलाई गत सिजन रविन्द्र जडेजाले राजस्थान रोयल्समा आबद्ध हुँदा अपनाएको कदमसँग तुलना गरिएको छ ।
पन्त सन् २०१६ देखि २०२४ सम्म दिल्ली क्यापिटल्समा आबद्ध थिए । उनले यस अवधिमा १११ खेल खेलेका थिए भने तीन सिजनमा ४३ खेलमा टोलीको कप्तानी समेत गरेका थिए । तर, २०२५ को मेगा अक्सनअघि सहमालिक समूहसँग केही मतभेद भएपछि उनलाई टोलीले रिलिज गरेको थियो ।
अब आगामी दुई वर्षसम्म फ्रेन्चाइजीको सञ्चालन जिम्मेवारी जेएसडब्लु समूहको हातमा रहनेछ । सह मालिक पार्थ जिन्दल पन्तका लामो समयदेखिका समर्थक मानिन्छन् र उनको पुनरागमनमा पनि उनको महत्वपूर्ण भूमिका रहेको बताइएको छ । यद्यपि दिल्ली फर्किए पनि पन्त कप्तान बन्ने विषय भने निश्चित भइसकेको छैन । कप्तानीबारे टोली व्यवस्थापनले छुट्टै निर्णय लिन सक्ने बताइएको छ।
पन्तको लखनउबाट बहिर्गमन भने धेरै अघिदेखि नै तय भएको मानिएको थियो । आईपिएल २०२६ सिजन सकिनुअघि नै सबै पक्षबीच उनले कप्तानी छाड्ने सहमति भएको बताइएको छ ।
उनको कप्तानीमा लखनउले लगातार दुई सिजन अपेक्षाअनुसार प्रदर्शन गर्न सकेन । टोली २०२५ मा सातौँ र २०२६ मा दसौँ स्थानमा सीमित रह्यो । पन्तको कप्तानीमा लखनउले २८ खेल खेलेको थियो, जसमा १० खेलमा मात्र जित हासिल गरेको थियो । २०२६ सिजनमा उनले ब्याटबाट ३१२ रन मात्र बनाउन सकेका थिए ।
यसपछि टोली व्यवस्थापनले नयाँ कप्तान आवश्यक रहेको निष्कर्ष निकालेको र त्यससँगै उनको बहिर्गमनको बाटो खुलेको बताइएको छ ।
खेलाडी आदानप्रदानअन्तर्गत कुलदीप यादव लखनउ सुपर जायन्ट्समा जाने चर्चा छ । उनको पारिश्रमिकमा कुनै परिवर्तन नहुने र उनी हालको १३ करोड २५ लाखको सम्झौतामै टोलीमा आबद्ध हुनेछन् ।
यो परिवर्तन कुलदीपका लागि पनि एक प्रकारको घर फर्काइ जस्तै हुनेछ । उनले घरेलु क्रिकेट उत्तर प्रदेशबाट खेलेका छन् भने पन्त दिल्लीका खेलाडीका रूपमा परिचित छन् ।
कुलदीप यसअघि मुम्बई इन्डियन्स, कोलकाता नाइट राइडर्स र दिल्ली क्यापिटल्सबाट आईपिएल खेलिसकेका छन् । यदि यो सम्झौता पूरा भएमा उनको करियरमा यो तेस्रो फ्रेन्चाइजी परिवर्तन हुनेछ ।
दिल्ली क्यापिटल्सको सहयोगी प्रशिक्षक समूहमा पनि ठूलो परिवर्तन हुन सक्ने बताइएको छ । विभिन्न रिपोर्टअनुसार पूर्व भारतीय अलराउन्डर युवराज सिंह टोलीको प्रशिक्षक समूहमा आबद्ध हुन सक्छन् । यदि त्यसो भयो भने यो उनको पहिलो औपचारिक प्रशिक्षक कार्यकाल हुनेछ ।
युवराजले पछिल्ला केही वर्षमा धेरै युवा खेलाडीका मार्गदर्शकका रूपमा काम गरिसकेका छन् । उनले अभिषेक शर्मा, प्रभसिमरन सिंह, अब्दुल समद, सञ्जु सामसन, ऋषभ पन्त र प्रियान्श आर्यासँग काम गरेका छन्। यी खेलाडीको प्राविधिक तथा मानसिक तयारीमा युवराजको योगदानबारे धेरै चर्चा हुने गरेको छ ।
युवराजले आफ्नो आईपिएल करियरमा पञ्जाब किङ्स, पुणे वारियर्स, रोयल च्यालेन्जर्स बेङ्गलुरु, दिल्ली, सनराइजर्स हैदराबाद र मुम्बई इन्डियन्सबाट खेलेका थिए । उनले पञ्जाब र पुणे वारियर्सको कप्तानी समेत सम्हालेका थिए ।
जेएसडब्लु समूहले व्यवस्थापन सम्हालेसँगै सौरभ गांगुलीको भूमिका पनि बढ्न सक्ने बताइएको छ । उनी फ्रेन्चाइजीका क्रिकेट मामिलाका प्रमुखका रूपमा पुनः सक्रिय हुन सक्छन् । युवराजलाई टोलीमा भित्र्याउने प्रयासमा पनि उनको महत्वपूर्ण भूमिका रहेको चर्चा छ ।
गांगुलीको पुनरागमनसँगै पछिल्ला दुई सिजनदेखि मुख्य प्रशिक्षक रहेका हेमाङ्ग बदानीको भूमिका समाप्त हुन सक्ने सम्भावना छ । बदानी र कप्तान अक्षर पटेलको नेतृत्वमा दिल्लीले आईपिएल २०२६ मा उत्कृष्ट सुरुआत गरेको थियो । तर दोस्रो चरणमा टोलीको प्रदर्शन खस्किएपछि टोली छैटौँ स्थानमा सीमित हुँदै प्लेअफ दौडबाट बाहिरिएको थियो ।
अन्य समाचारहरु
