आषाढ़ ९ गते, २०८३ मा प्रकाशित
काठमाडौँ । जारी फिफा विश्वकप फुटबलमा भोली बिहान क्रोएसिया र पनामा आमने सामने हुदैछन् । क्यानडाको टोरन्टो स्टेडियममा हुने यो खेल नेपाली समय अनुसार भोली बिहान ४: ४५ बजेदेखि शुरु हुदैछ ।
विश्वकपको पहिलो खेलमा दुवै टोलीले निराशाजनक हार बेहोरेपछि उनीहरू दबाबमा छन् । समूह एल अन्तर्गतको आफ्नो पहिलो खेलमा क्रोएसिया इङल्याण्डसँग ४-२ ले पराजित भएको थियो ।
क्रोएसियाका प्रशिक्षक ज्लात्को डालिचलाई भने सुरुआती हारले धेरै चिन्ता नहुन सक्छ, किनकि पछिल्ला विश्वकपहरूमा पनि उनीहरूको सुरुआत कमजोर रहने गरेको छ। पछिल्ला छ विश्वकपमध्ये चारमा क्रोएसियाले पहिलो खेल हारेको इतिहास छ, तर त्यसका बाबजुद पनि टोली पछिल्ला दुई संस्करणमा कम्तीमा सेमिफाइनलसम्म पुगेको थियो ।
अब क्रोएसियाको लक्ष्य लगातार दोस्रो हार टार्दै प्रतियोगितामा फर्किने हुनेछ। यसअघि उनीहरूले सन् २००२ मा एक्वेडोर र त्यसपछि चार वर्षपछि ब्राजिलसँग लगातार हार बेहोरेका थिए।
अनुभवका हिसाबले पनि क्रोएसिया बलियो छ । कप्तान लुका मोड्रिचले यो खेलमार्फत १० फरक ठूला प्रतियोगितामा सहभागिता जनाउने दोस्रो युरोपेली खेलाडी बन्ने कीर्तिमान बनाएका छन् । तर उनी पहिलो खेलमा ५८ मिनेटमै बाहिरिएका थिए, जुन उनका ३४ सुरुआती खेलमध्ये सबैभन्दा कम समय हो।
अब मोड्रिचले आफ्नो २००औं अन्तर्राष्ट्रिय खेलमा अझ प्रभावशाली प्रदर्शन गर्ने लक्ष्य राख्नेछन् । प्रशिक्षक डालिचले भने मध्यभागमा मातेओ कोभाचिचलाई थप जिम्मेवारी दिन सक्ने सम्भावना छ।
त्यस्तै पनामाले पनि पहिलो खेलमा हार बेहोरेको थियो । घानासँग १-० को पराजय भोग्दै उसले अन्तिम मिनेटमा गोल खाएको थियो। पनामाका प्रशिक्षक थोमस क्रिस्टियानसेनको टोली हालसम्म विश्वकपमा खेलेका चारै खेलमा पराजित भएको छ । उनीहरूले १२ गोल खाइसकेका छन् भने मात्र दुई गोल गर्न सकेका छन् ।
तथ्याङ्कका हिसाबले पनि पनामा कमजोर देखिन्छ, तर पहिलो खेलमा केही सकारात्मक संकेत भने देखिएका थिए । आक्रमणतर्फ प्रशिक्षकले इस्माएल दियाजलाई सुरुआती टोलीमा उतार्न सक्ने अनुमान छ। उनी गत गोल्ड कपमा सर्वाधिक गोलकर्ता बनेका थिए।
क्रोएसिया र पनामा पहिलो पटक आमनेसामने हुँदैछन् । तर क्रोएसियाले अमेरिकी महादेशका टोलीसँग पछिल्ला १० विश्वकप खेलमध्ये ७ हार बेहोरेको तथ्य पनि उनीहरूको लागि चिन्ताको विषय हो । समग्रमा, दुवै टोलीका लागि यो खेल समूह चरणमा टिकिरहन अत्यन्तै महत्वपूर्ण हुनेछ ।
अन्य समाचारहरु
